Aappaagumut raajartassat 110.000 tonsinik TAC-lerneqarput

Naalakkersuisut decembarip 4-anni 2019-imi aalajangerpaat nunatta Kitaani aappagu raajartassat TAC-at, akuerisaasumik aalisarneqarsinnaasut, 110.000 tonsiussasoq.

Kitaani raajartassat ilisimatuussutsikkut 2020-mut siunnersuutigineqartut 110.000 tonsiupput.

Raajartassat ukioq maannamut sanilliullugit 5.000 tonsinik amerlanerupput.

2020-mut TAC-liunneqartumit 2.800 tonsit EU-mut raajartassiissutigineqarput, EU-mik Aalisarneq pillugu isumaqatigiissut naapertorlugu raajartassiissutaallutik.

Canadamut 1.617 tonsit rajartassiissutissanngorlugit immikkoortinneqarput.

Tunumi raajartassat ilisimatuussutsikkut 2020-mut siunnersuutigineqartut ukioq mannatut amerlassuseqarput 2.000 tonsiullutik.

Tunumi raajartassat TAC-at aalajangerneqarpoq 4.750 tonsiussasoq, ukioq maannamut sanilliullugit tonsinik 750-inik amerlanerupput.

Tunumi raajartassat TAC-annit 4.400 tonsit EU-mut 2020-mi raajartassiissutigineqarput, EU-mut Aalisarneq pillugu isumaqatigiissut naapertorlugu.

Flemish Cappimi, New Foundlandip kangiani, kingumut raajarniartoqaqqissinnaanngorpoq, raajat pisassiissutigineqartut amerlanerpaamik 5.448 tonsit aalisarneqarsinnaallutik. Flemish Cappimi raajarniarfigineqartartoq piujuaannartitsinissamut killingitinneqartup ammut killinga qaangerneqarmat 2011-mi unitsinneqarpoq.

3M-imi raajanut aqutseriaatsimi pineqartumi ullut aalajangersimasut immikkut aalisarfissat pineqarput, tassani ullut aalajangersimasut nunamut ilaasortaasumut tunniunneqartarlutik siusinnerusukkut pisarineqartunut kisitsisit naatsorsorneqartut tunngavigalugit, tassalu nunap pineqartup oqaluttuarisaanikkut NAFO-p imartaani 3M-imi aalisarsimasai. Kalaallit Nunaat tassunga atatillugu 2020-mi ulluni 129-ini aalisarsinnaassaaq.

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi immikkoortortami pisortaq, Birgitte Jacobsen. E-mail: bija@nanoq.gl