Bruxellesimi isumasioqatigiinnermut juullerpalaartumillu ilasseqatigiinnermut Ane Lone Bagger qaaqqusisuuvoq

Ilinniartitaanermut, Kultureqarnermut, Ilageeqarnermut Nunanullu allanut Naalakkersuisup Bruxellesimut tikeraarneranut atatillugu Kalaallit Nunaata Bruxellesimi sinniisoqarfianit isumasioqatigiisitsineq juullerpalaartumillu ilasseqatigiisitsineq Danskit aallartitaqarfianni Bruxellesimiittumi decemberip 17-ianni ingerlanneqarpoq. Qaaqqusat tassaapput EU-mi suleqatit, EU-Kommissioni, Europa-Parlamenti, ambassadørit allallu diplomatit, NATO-mi attaviit, kattuffinnit aallartitat assigiinngitsut, allallut suleqatigilluartakkat soqutigisaqaqatigiit il.il.

 

Ane Lone Bagger Kalaallit Nunaata EU-mut attaveqarneranut politikkikkut akisussaasuuvoq, suleqatigiinnermilu ukkatarineqartut ilagaat ilinniartitaaneq. Taamaattumik isumasioqatigiinnermi pissusissamisoorpoq naalakkersuisoqarfiup pisortai angalaqataasut Lone Nukaaraq Møller (ilinniartitaaneq) aamma Kenneth Høegh (nunanut allanut), EU-mik suleqateqarnermi sulianut attuumassutillit Kalaallit Nunaannilu ineriartornerit kingulliit pillugit saqqummiussinerat. Ane Lone Baggerip isumasioqatigiinneq naggaserlugu pingaarnertut oqalugiartuuvoq Naalakkersuisullu tungaannit isiginninneq saqqummiullugu, tamatumalu kingorna tusarnaartunit oqaatigiumasat apeqqutissallu piffissaqarfigineqarput, tamannalu atorluarneqarpoq. Ilaatigut apeqqutigineqarpoq nunanut pissaanilinnut Kalaallit Nunaata attaveqarnera, EU-p Kalaallit Nunaatalu attaveqaqatigiinnerisa ineriartornerat kalaallit tungaannit isigalugu qanoq isigineqarnersoq.

 

Ukioq Kalaallit Nunaannut pisoqarfiulluarpoq, Kalaallit Nunaata avataanit ukkatarinninneq annertuvoq, nunarsuarmioqatigiillu Issittumi sumiiffinnilu suliaqartitsinerat annertuserujussuarnikuuvoq.

 

Majimi Europa-Parlamentimut nutaamik qinersisoqareerneratigut EU-mi qinikkat katitigaanerat annertuumik allannguuteqarpoq, Det Europæiske Rådimi nutaamik Præsidentitaarput Europa-Kommissionillu nutaat nutaanik piginnaatitaaffillit aqutsinerallu akuersissutigineqarput. Naatsorsuutigineqarporlu EU-p ukiuni tulliuttuni arfineq marlunni missingersuutissaasa isumaqatiginniutigineqarnerat inissinneqassasoq, tamannalu Kalaallit Nunaannut immikkut pingaaruteqarpoq. Tassaniippormi OLT-mik aaqqissuussap Suleqatigiinnissamullu isumaqatigiissutip ataatsimut allanneqartussat aningaasalersornissaat, taamaalillunilu Kalaallit Nunaannut tunniunneqartussat inissinneqarfissaat. Taakku saniatigut 2020-p aallartinnerani EU-mut aalisarnermut isumaqatigiissutissamik nutaamik isumaqatigiinniarneq aallartissaaq. Maannamummi isumaqatigiissut atuuttoq december 2020-mi atorunnaassaaq.

 

”Ane Lone Bagger ima oqarqarpoq: ”EU-mi suleqatigisatsinnik oqaloqateqartarnissaq pingaarutilerujussuuvoq, tassuuna EU-mik Kalaallit Nunaanni Issittumilu ataatsimut isigalugu suleqatigiinnerup ingerlaannarnissaanik ineriartortinnissaanillu ilisimatitsissalluta.”


 

Isumasioqatigereernerup kingorna Ane Lone Bagger Naalakkersuisut sinnerlugit ullup qeqqasiornermi juullerpalaartumik ilasseqatigiisitsisoqarpoq, tassanilu aalisakkat qaleruallillu Royal Greenlandimit tunniussaasut sassaalliutigineqassapput.

 

Annertunerusunik paasisaqarusukkussi:Sinniisoqarfimmi pisortaq Mininnguaq Kleist: email: mikl@nanoq.gl , mobil: +32 499999858