Naalakkersuisoq Ane Lone Bagger Bruxellesimi

Ilinniartitaanermut, Kultureqarnermut, Ilageeqarnermut Nunanullu allanut Naalakkersuisoq Ane Lone Bagger ullumi ataasinngornermi 16. december 2019 EU-kommisærinik marlunnik qitiusumik inissisimasunik ataatsimeeqateqarpoq. Ataatsimiinnermi siullermi Europa-Kommissionimi Siulittaasup Tulliatut Aqutsisuusoq, Digitalimut Unammilleqatigiinnermullu Kommissæriusoq Margrethe Vestager ataatsimeeqatigineqarpoq ataatsimiinnermilu tulliani EU-Kommissærinngorlaaq Nunat Tamalaanik Isumaqatigiissuteqarnermik akisussaaffilik Jutta Urpilainen ataatsimeeqatigineqarluni.      

 

Kommisæritut toqqarneqaqqeqammersoq Vestagerip ataatsimeeqatiginerani Kommissionip pilersaarutai politikkialu ilisimatitsissutigineqarput, taamatullu EU-mut unammillernartutut isigineqartut paasissutissiissutigineqarput. Tassunga atatillugu Vestagerip eqqaavai maanna EU-Kommissioninngortup avammut ammanerunissa EU-llu nunarsuarmioqatigiinni inissisimanerata nukittorsarnissaa sulissutiginiaraa. Ane Lone Baggerip Kalaallit Nunaanni ineriartorneq Naalakkersuisullu anguniagaat, ilaatigut EU-mik qanimut suleqateqarnerup ingerlaannarnissaa isumaqatigiissutit assigiinngitsut aqqutigalugit kissaatigineqartoq oqaatigaa.

Ilinniartitaanermut, Kultureqarnermut, Ilageeqarnermut Nunanullu allanut Naalakkersuisoq ima oqaaseqarpoq:

”Bruxellesimi tikeraarninni Margrethe Vestagerip ataatsimeeqatiginissaa inissaminiippoq. Vestagerip EU-p digitalinngortitsinermut  periusissiaanut – Europa digitaliusumik ingerlatsinissamut piareersimasoq akisussaaffigaa, Naalakkersuisullu Kalaallit Nunaata digitalinngortitsinermut periusissiaat politikkikkut uanga akisussaaffigaara.”

Ane Lone Baggerillu ilanngullugu erseqqissaatigaa: ”Ataatsimiinnerup illuatungeriilluni ilisimatitseqatigiinnissaq periarfissaqartippaa, tamannalu tulluartuuvoq, EU-Kommissionimmi nutaap atuutilernerani illuatungeriilluta isigisavut politikkivullu paaseqatigiissutiginissaannut.”

 

EU-Kommissærip Jutta Urpilainenip ataatsimeeqatiginera

Jutta Urpilainen Finlandimeersuuvoq, Europa-Kommissionimilu ilaatigut EU-mut Nunat Imarpiup Akianiittut Nunasiaataasimasullu (OLT) politikkikkut akisussaaffigai, taamatullu Kalaallit Nunaata EU-mut suleqatigiinnissamut isumaqatigiissutaa. Taamaattumik pissusissamisuuginnarpoq Jutta Urpilainen Ane Lone Baggerilu naapeqatigiinnerat.

Urpilainenip Ane Lone Baggerimik naapitsinini nuannaarutigeqalugu ersersippaa, qilanaarutigaalu Kalaallit Nunaannik suleqateqarnissaq. EU-p OLT-mik aaqqissuussinera Kalaallit Nunaannullu isumaqatigiissutip ataatsimut allassimalertussaavoq, tamannalu annertuumik pisariillisaanermik kinguneqarpoq.

Kalaallit Nunaannilli suleqateqarnermi sinaakkutit maannakkutut tunngaviusumik ingerlaannarnissaat naatsorsuutigineqarpoq, tamanna Urpilainenimit oqariartuutigineqarpoq.

Ilinniartitsisutut ilinniarsimasoq Urpilainenip oqariartuutigaa politikkikkut inuusuttut neriuuteqalersinnissaat periarfissinnissaallu pinngitsoornani suliassaasoq, taamaammallu ilinniarneq tamatumani qitiulluinnartuusoq.

Urpilainenip ataatsimiinnermi Kommissionip politikkianik siunissamilu pilersaarutinik ilisimatitsinissaminut periarfissaq atorluarpaa, qularineqassanngitsorlu Kalaallit Nunaata EU-mut pingaaruteqartoq eqqaallugu.

Ane Lone Baggerip Kalaallit Nunaanni ilinniartitaanikkut siuarsaanermi EU-mik suleqateqarneq Kalaallit Nunaata siuariartornissaanut pingaarutilerujussuusoq oqaatigaa, tigussaasunillu angusaqarfiunera erseqqissaatigalugu. Naalakkersuisunit kissaatigineqarpoq EU-mik ilinniartitaanerup tungaatigut suleqateqarneq suliaqarfittut pingaarnertut ingerlaannassasoq. Naalakkersuisup Kalaallit Nunaanni ineriartorneq, Naalakkersuisullu anguniagaat Urpilainenimut ilisimatitsissutigai.

Ilinniartitaanermut, Kultureqarnermut, Ilageeqarnermut Nunanullu allanut Naalakkersuisoq ima oqarpoq:

Kommissær Urpilainenimik ataatsimeeqateqarneq pitsaasumik ingerlavoq, tassuunalu Kalaallit Nunaata EU-llu Europa-Kommissioni nutaaq peqatigalugu attaveqaqatigiinneq pitsaasoq uppernarsaqqinneqarpoq. EU-mi aalajangiisartut nutaat toqqaannartumik ilassinissaat, ilinniartitaanerlu siunissami suleqatigiissutiginissaa oqaloqatigiissutigalugu pingaaruteqarluinnarpoq, tassami EU annertuumik allanngortitserivoq, nutaamik aqutsisoqalerpoq taamattaaq aningaasanut inatsisissap 2021-mi atuutilertussap ”EU-p aningaasanut inatsisissaa ukiuni arfineq marlunni” isumaqatiginninniutigineqarluni.

Ataatsimiinnermi Kommissær Jutta Urpilainen Naalakkersuisoq Ane Lone Baggerilu ukioq mannamut Financing Agreementimik atsioqatigiipput, tassuuna qulakkeerneqarpoq ukioq manna suleqatigiinnermut isumaqatigiissutip aningaasartassaasa 217 mio.kr. missarluinnaaniittut EU-mit Kalaallit Nunaannut tunniusseqarnissaanut qulakkeerinnittuusoq. Atsioqatigiinnermi aaqqissuussineq qaffasissumik ingerlanneqarpoq. avataanit alaatsinaanneqarnissaq anguniarlugu, tassuuna ersersinneqarluni EU-p Kalaallit Nunaatalu qanimut suleqatigiittut ingerlaqqinnissaat.

Annertunerusunik paasisaqarusukkussi: Sinniisoqarfimmi pisortaq Mininnguaq Kleist: e-mail: mikl@nanoq.gl , mobil: +32 499 99 98 58