Aalisagaativut – atugarissaarnerput

Aalisarneq pillugu Ataatsimiititaliarsuarmit tusagassiorfinnut nalunaarut

Aalisarneq pillugu Ataatsimiititaliarsuup maannamut sulinini qaammat apriili aallartinneqartoq tunngavigalugu aalisarnermut tunngasunut arlalinnik innersuussutitalik oqallisissiaq ullumi saqqummiuppaa.

Oqallisissiami inuit tamat oqallilluarnissaannut tunngavissiinissaq aamma Aalisarneq pillugu Ataatsimiititaliarsuup suleqqinnerani atugassanik annertunerusumik oqaloqatigiinnissamut tunngavissiinissaq siunertaavoq.

Aalisarneq pillugu Ataatsimiititaliarsuaq tamanut ammasumik Hotel Hans Egedemi nal. 16.30 ataatsimeersuarnermi,
kikkut tamarmik tikilluaqqusaaffigisaanni, oqallisissiamik ullumi saqqummiussissaaq.

Ataatsimiinnermit toqqaannartumik aallakaatitsisoqassaaq.

Qallunaatut uani malinnaasinnaavutit: https://digitalimik.adobeconnect.com/fiskerikommisionendebatoplaegdansk/

Kalaallisut uani malinnaasinnaavutit: https://digitalimik.adobeconnect.com/fiskerikommisionendebatoplaegkalaallisut/


Oqallisissiaq innersuussutitalik uani pissarsiarisinnaavat.

_____

Ataatsimiititaliarsuaq sulinermi aallartinnerani pingaarnertut suliakkiutigineqartut aallussimavai, tassunga pingaartumik ilanngullugit aalisarnermik inuussutissarsiummi uumassuseqarnikkut aningaasarsiornikkullu piujuartitsisinnaanermik eqqarsaatiginninneq. Taamaalilluni suliakkiussap aallarniutaanit takuneqarsinnaavoq:
”Ataatsimiititaliarsuup sulinerani siunertaq pingaarnerpaaq taamaalilluni tassaavoq Aalisarneq pillugu Ataatsimiititaliarsuup aalisarneq pillugu inatsisissamut suliniutissanullu tassunga atasunut allanut aalisarnerup ineriartornissamut periarfissaanut pitsaasumik tapersiisinnaasunik inuiaqatigiillu aalisarnermik pisuussutinillu annertunerpaamik iluaquteqarnissaannut qulakkeerinneqataasinnaasunik inassuteqaateqartoqarnissaa.”
Tamanna tunuliaqutaralugu misissueqqissaarnernik, allaaserisanik naatsorsuinernillu arlalinnik naammassisaqartoqarsimavoq, suliassat allattorsimaffiani saqqummiunneqartunut piumasaqaatinut naapertuuttunik maannakkut ingerlatsineq atuuttoq ilumut aalisarnermut killissaliinersoq akissutissarsiffiginiarlugu. Taamaaliortoqassaaq pitsanngornissaanut siunnersuutinut patajaatsumik tunngavissanik pilersitsisoqarnissaanut.

Ataatsimiititaliarsuup sulinerani aalisakkanik isumalluutit inuiaqatigiit pigisarigaat qitiulluinnartumik tunngaviusimavoq, taamaattumik inuussutissarsiornermut piffissami killilimmi atugassiissutigineqartarput, tassanilu atuinermut iluanaarutip ilaa naleqquttoq inuiaqatigiinnut tutsinneqartarpoq.

Ataatsimiititaliarsuup maannamut angusai ilaatigut imaattut eqikkarneqarsinnaapput:

Uumassuseqarnikkut piujuartitsineq aalisarnermik nakkutiginninnermi tunngavittut - isumaliutiginninnerugallartut:
Pisuussutinik ingerlatsinermik pitsanngorsaaneq, siunissami ungasinnerusumi inuiaqatigiittut iluanaarutissamut annertunerpaamut tunngavissiisussaq, iluaqutaasumik tunngavinnik tulliuttunik tunngaveqartumik aallaaveqarsinnaavoq:
  • TAC (Pisat annertussusaat akuerisaasut tamakkiisut) taamaaqataanillu pisassiissutit siunissami aalisagaqassutsip amerliartoqqinnissaasa qulakkeerneqarnissaani annertussutsinit amerlanerusariaqanngillat.
  • Aalisagaqatigiit aallaavigalugit biologit siunnersuinerat pitsaalluinnartoq.
  • Pisarisinnaasatigut nikerarnerit malillugit uumassusilerituut siunnersuinerannit imminermini oqimaaqatigiisitsisuusoq aallaavigalugu TAC-imik aalajangersaaneq naapertorlugu aalisagaqatigiiaanut pingaarutilinnut tamanut ingerlatsinissamut pilersaarutinik, ilisimatuut, atuisut ingerlatsisullu akornanni inerisarneqarsimasunik, inatsisinngortitsilluni naqissusiineq. Tassa imaappoq aqutsinissamut pilersaarutinut tunngatillugu akuliutinnginnissamik tunngavik atorneqartariaqarpoq.
Ilisimatusartut, atuisut aqutsisullu akornanni suleqatigiinnermut iluserititat, siuliini allanneqartut killiulissat iluini, inerisaqqinneqarnissaat pisariaqartinneqarpoq. Tamanna nunat tamalaat akornanni periuserineqartartut nalinginnaasumik akuerineqarsimasut aallaavigalugit pisariaqarpoq.

Aalisarnermik inuussutissarsiummi siuariartornissamut ineriartornissamullu periarfissat - isumaliutiginninnerugallartut
Aalisarnermik aningaasaqarnikkut ingerlatsineq mianersortoq, siunissami ungasinnerusumi inuiaqatigiit annerpaamik iluanaaruteqarnissaannut tunngavissiisinnaasoq, iluaqutaasumik tunngaviusumik tunngavissat tulliuttut atorlugit sananeqarsinnaavoq:
  • Pisassiissut nammineq pigisat ukiuni arlaqartuni inatsisitigut pisassiissutigineqartut aqqutigalugit aalisarnermik inuussutissarsiummut sunniuteqarluartumik namminersortutut aningaasalersuinissamut pilersaarusiorneq.
  • Aalisarnermik inuussutissarsiummik ingerlatani periarfissanillu atorluaaneq piginnaasaqarnerup aningaasaqarnikkut sunniuteqartumik atornera (pisat, suliareqqiineq aamma tunisineq) niuerutigineqarsinnaanerit eqaatsuunerlu aqqutigalugit.
  • Ingerlatsinikkut aalisarnermut tunngasunut inuiaqatigiillu ineriartornerinut pingaarnertut anguniakkanik takussutissiineq, matumani ingerlatsineq sunniuteqarluartariaqarpoq paasiuminartuullunilu.
Tamatuma ilutigisaanik Aalisarneq pillugu Ataatsimiititaliarsuup eqqumaffigaa najukkami naammassisaqartarnermut aamma inuuniarnikkut mianerisassat eqqarsaatigalugit aalisarnermut politikip isumaliutiginissaa pisariaqartinneqarnersoq. Ataatsimiititaliarsuup paasinninnera malillugu pissusissamisuussaaq politikikkut isumaliutersuuteqarneq taama ittoq paasiuminartumik pissasoq tunngaviit tulliuttut aallaavigalugit:
  • Najukkanik inuuniarnikkullu mianerisassanik akuutitsinermi iluaqutit akornutillu, pisuussutinit iluanaarutinit akitsuummut tamakkiisuusumut appartitsisinnaasut, nassuiarneqassapput, qulaajaaffigineqassapput aamma sinaakkutinik aalajangersaanermut atatillugu ersarissarneqassapput.

Sunniuteqarluartumik aalisarnermi nakkutilliisarneq - isumaliutiginninnerugallartut
Malittarisassanut atuutinneqaannaratik aammali malinneqartussanut inassuteqaatit, ukunani:
  • Malittarisaliorneq ataqatigiissumik aaqqissuussamik killissalersuinissamik eqqummaariffiusoq, annikitsuaqqanik malittarisaliorneq piunnaarlugu.
  • Aaqqissuussineq annikitsuaqqanik malittarisassaliornerup paarlattuanik tunngaviusunik malittarisassaliornermi ajornartorsiutinik sammisaqartoq.
  • Aalisarnermut aqutsisoqarfik ersarissunik killiliisimasoq killiuliussallu taakku iluini aalisartut namminneq aalajangersinnaallugit nioqqutissiornissamut atortut, taakkulu qanoq atorneqarnissaat.
  • Malittarisassiassanut ilassutissat allat ajornartorsiutinut aaqqiiffigineqarnissaanik kissaateqarfiusunut sammitinneqassapput (assersuutigalugu aalisariutit tamarmiusut pisarisinnaasaasa nalimmassarneqarnissaannut).
  • Aqutsinissamik pilersaarusiat inatsisiliornermit tunngaveqassapput.
  • Aalisarnermit nalunaaruteqartarnerup aamma alapernaarsuinerup digitalinngortinnissaata eqqumaffiginissaa.
  • Aalisarnermik nakkutilliinerup piffissani naammattumik akuttussusilinni avataaneersunit nalilersuiffigineqartarnissaa.
Aalisarnermik nakkutiginninnermut tamanullu ammanermut naleqqiullugu paasissutissat paasissutissallu paasiuminartuuneri - isumaliutiginninnerugallartut:

Innersuussutit:
  • Aalisarnermit paasissutissat paasiuminartuunerisa annertusinissaat pillugu politikikkut siunertarisaq inatsisikkut aalajangersarneqassasoq,
  • Paasissutissanik katersinermut ersarissumik tunngaviit periuserisassallu suliarineqassasut.
  • Sulinermi periutsit ingerlannartunngortinnissaat aallunneqarnerussasoq, taamaalilluni interneti aqqutigalugu immersuiffissat digitaliusut ikiorsiullugit paasissutissanik tunniussisoqarsinnaassammat, matumani qarasaasiami toqqorsivimmut toqqaannartumik paasissutissat toqqorneqarsinnaassallutik.
Ataatsimiititaliarsuup sulinerata nanginnera

Ataatsimiititaliarsuup suleqqinnera ilaatigut tassaassaaq suliakkiussami sammisat suliarineqareersut iluanni inassuteqaatit erseqqissarnissaat aamma oqallisissiamut ilanngitsut sammisat amigaatigineqartut misissoqqissaarnissaat.
Tassani pineqarput apeqqutit pingaarutillit arlallit assersuutigalugu sinerissamut qanittumi aalisarnerup nutarterneqarnissaanut killiliussat pitsaanerusut aamma aalisarnermi ingerlataqartunut nutaanut periarfissat ajornannginnerusut.