Sisimiuni ilinniartut angerlarsimaffianni ikuallattumi putsumut kalerrisaaruteqanngitsoq

Sapaatit akunneranni kingullermi Sisimiuni ilinniartut angerlarsimaffianni ikuallattoqarnerata kingorna, ilinniartut angerlarsimaffiini putsumut kalerrisaarusersuinissamut illuliornermut malittarisassani piumasaqaateqartoqanngitsoq annaassiniarnissamut upalungaarsimasut oqaaseqarput.

Ilinniartut angerlarsimaffiini minnerni – tassalu ilinniartut angerlarsimaffiini amerlanerpaamik qulinut siniffissalinni – maannarpiaq BR 2006-imi Kap. 6.10.4 Akunnittarfiit il.il., amerlanerpaamik qulinut siniffissallit naapertorlugu putsumut kalerrisaarutinik kalerrisaarutinilluunniit allanik ikkussuinissamut piumasaqaateqartoqanngilaq. Piumasaqaatit allat, illut minnerusut ikuallannginnissaannut qulakkeeriffiusussat soorunami isiginiarneqassapput.

Pisumi matumani ilinniartunut inissiaq minnerusoq, tassalu illu amerlanerpaamik qulinut siniffissalik pineqarpoq.

Erseqqissaatigineqarsinnaavoq, illuliornermut malittarisassat nutaat maanna Ineqarnermut Attaveqaqatigiinnermullu Naalakkersuisoqarfimmit suliarineqarmata. Illuliornermut malittarisassaliarineqartuni putsumut kalerrisaarusersuinissaq pillugu piumasaqaat ilanngunneqassaaq, tassalu ilinniartunut inissiaannaanngitsuni, illunilu najugaqarfiusuni tamangajanni. Aamma inatsit aqqutigalugu illut pioreersut putsumut kalerrisaarusersorneqarnissaannut qanoq annertutigisumik piumasaqartoqarsinnaanersoq Naalakkersuisoqarfimmit misissuiffigineqarpoq.

Ineqarnermut Attaveqaqatigiinnermullu Naalakkersuisoq Karl Frederik Danielsen oqarpoq:
”Illuliornermut malittarisassanut siunnersuut ukiumi tulliuttumi tusarniaassutigineqareernermi kingorna erngerluni atuutilernissaa naatsorsuutigaara.

Tamannali pitinnagu putsumut kalerrisaarummik ataatsimik amerlanerusunilluunniit inissiamut najukkamut ikkutassamik nammineerluni pisinissamut kajumissaaruteqaannarsinnaavunga. Taamaattunut aningaasaliinissaq isumatusaarnerussasoq qularutiginngilluinnarpara.

Annertunerusumik paasisaqarusunnermi Ineqarnermut Attaveqaqatigiinnermullu Naalakkersuisoqarfik box909@nanoq.gl aqqutigalugu attaveqarfigineqassaaq.