Inuussutissarsiornermut periarfissat attaveqaqatigiinnikkut

Aningaasaqarnermut Aatsitassanullu Naalakkersuisoq, Vittus Qujaukitsoq, DI-p 2019-imi Kalaallit Nunaat pillugu ataatsimeersuarnerani peqataavoq. Ataatsimeersuarnermi siunertaavoq Kalaallit Nunaanni inuussutissarsiornermut periarfissat pillugit paasissutissiinissaq, ilanngullugit attaveqaqatigiinneq, takornariartitsisarneq aamma aatsitassarsiornermik suliaqarneq. Oqalugiartut akornanni qulequtaq pingaarneq tassaavoq: "Attaveqaqatigiilernissaq ".

Ulloq 4. december 2019 Dansk Industri-mi ukioq manna Kalaallit Nunaat pillugu ataatsimeersuarnermi Issittumi inuussutissarsiornerup ineriartornera pillugu saqqummiinermut oqallinnermullu inuussutissarsiortut, kattuffiit aamma politikerit nunami namminermeersut aammalu nunanit allaneersut 250-init amerlanerusut katersuupput. Soqutiginninneq aatsaat taama annertutigaaq, tamatumunngalu USA-p tungaaniit kingullertigut Kalaallit Nunaata soqutigineqarnera aamma pissutaasoq ilimanarpoq. Taamaalilluni nunat sinniisoqarfii 30-ngajaat ataatsimeersuarnermi aallartitaqarput.

Aningaasaqarnermut Aatsitassanullu Naalakkersuisoq, Vittus Qujaukitsoq, ataatsimeersuarnermi aallarneeqataavoq, ilaatigut Kalaallit Nunaanni aalisakkat kisimik sammineqanngitsut oqariartuutigalugu. Kalaallit Nunaata aningaasaqarnikkut isertitaqarfiisa assigiinngisitaartinnissaat pisariaqarluinnarpoq, aammalu annertoorujussuarnik periarfissaqarfiusut ilaat tassaapput aatsitassarsiorfinnik suliaqarnerup iluani suliassaqarfiit. Kalaallit Nunaanni inatsisit malinneqarpata, aammalu soorunami aningaasaliisunut aammalu inuiaqatigiinnut kalaallinut isertitaqarnissamut periarfissaqalersitsisoqarpat, Kalaallit Nunaanni nunani allamiut aningaasaliiumasut tikilluaqquneqarput. Kalaallit Nunaat qanoq neqerooruteqarsinnaasoq arlallit takusinnaammassuk Naalakkersuisut soorunami nuannaarutigaat, kisianni aningaasaliinernik isumaqatigiissutinillu aalajangersimasunik piviusunngortitsinissaq pisariaqarpoq. Kalaallit Nunaanni aatsitassanik piiaaneq ingerlatassaavoq akisooq, suli nalorninartortaqarnera malunnarluni.

Maannakkorpiaq Kalaallit Nunaanni aatsitassarsiorfiit ingerlatsiviusut marluupput, kisianni ingerlatseqatigiiffiit arlalippassuit, aatsitassarsiorfinnik nutaanik periarfissaqalersinnaaneq siunertaralugu Kalaallit Nunaanni nunap iluani misissuillutik suliaqaleruttorput.

Taamaattumik aatsitassarsiorfinni suliaqartut aallartitaat ataatsimeersuarnermi peqataajartorsimapput. AEX Gold, Nalunami kuultisiorfiup ammaqqinnissaanik pilersaaruteqartoq, najuuppoq.
Aamma Kina-miut Shenghe Resources peqataavoq. Kina-miut aatsitassanut suliarineqanngitsunut aningaasaliisartut Greenland Minerals-imi, Kuannersuarni aatsitassarsiorfeqartumi, nunarsuarmi aatsitassat qaqutigoortut iluanni aatsitassarsiorfiit annersaannut ilaalersinnaasumi, pingaarnertut aningaasaliisuupput.

Aatsitassarsiornermik suliaqartut saniatigut ilaatigut Karsten Høy, Greenland Venture-meersoq, Jóhannes Egholm Hansen, Kalaallit Airports-imut siulittaasoq, aamma folketing-imi ilaasortat marluk Aaja Chemnitz Larsen (IA) aammalu Aki-Matilda Høegh-Dam (S), aamma ataatsimeersuarnermi peqataapput.

Paasissutissat sukumiinersurusut uannga pissarsiarikkit: Jørgen T. Hammeken-Holm, pisortaaneq, Aatsitassanut Naalakkersuisoqarfik. Oqaras.: +299 346846 Mail: joeh@nanoq.gl

Link-it attuumassuteqartut matuma kingulianniittut takusinnaavatit:

https://www.dr.dk/radio/p1/orientering/orientering-2019-12-04/01:26:08


https://via.ritzau.dk/pressemeddelelse/presseinvitation-til-dis-gronlandskonference-2019?publisherId=5524343&releaseId=13584303

https://sermitsiaq.ag/node/217925


https://knr.gl/da/nyheder/rekordstor-interesse-til-gr%C3%B8nlandskonference-i-danmark

https://nyheder.tv2.dk/business/2019-12-05-disse-sten-viser-hvorfor-stormagterne-bejler-til-groenland