Arsummi angallanneq aallarteqqippoq

Novembarimi Arsummi anorersuarnerani ikaartarfik ajoqusingaatsiarpoq, taamaattumillu Arctic Umiaq Line-mit taliffigineqarsinnaajunnaarluni. Ikaartarfik maanna iluarsineqareerpoq atorsinnaalerlunilu, taamaalillunilu Arsummi angallanneq aallarteqqippoq.

 

Iluarsaassinerup saniatigut ikaartarfiup kisai, novembarimi ajutoornermut peqqutaasut qajannaallisarneqarput.

 

Iluarsaassinermi najugaqartut, ikaartarfiup atortuinik pilersuisut aammalu entreprenøri iluarsaassisoq suleqatigilluarneqarput.

 

Ineqarnermut Attaveqaqatigiinnermullu Naalakkersuisoq Karl Frederik Danielsen oqarpoq:

”Sullissisut, iluarsaassassat sapinngisamik pilertornerpaamik naammassiniarlugit, taamaalillunilu Arsummut Arsummiillu ilaasunik angallassisoqaqqilersinnaanissaa qulakkeerniarlugu suliniuteqarluartorujussuit suleqatigilluarneqarneri nuannaarutigaara.”

 

Annertunerusumik paasisaqarusunnermi Ineqarnermut Attaveqaqatigiinnermullu Naalakkersuisoqarfik, box909@nanoq.gl, attaveqarfigineqassaaq.