Isumaginninnikkut aarlerinartorsiortut sumiiffimminni oqartussaasunit ikiorneqartariaqarput

Pisortat neqerooruterpassuinik isumaginninnikkut aarlerinartorsiortut angerlarsimaffeqanngitsullu atuinerminnik atuinissaminnillu ajornartorsiuteqarput. Pisortani aaqqissuussinerit oqarasuaatikkut sianerfigalugit utaqqisorpassuaqarfiusarput, aalajangersimasumik piffissalerlugit ataatsimeeqateqarfiusarput, immersugaq malillugu ingerlatsiviusarlutik il.il., taamaammallu isumaginninnikkut aarlerinartorsiortut angerlarsimaffeqanngitsullu angunissaannut naleqqussagaanatik. “Inuiaqatigiittut tamanna isummerfigisariaqalerparput aamma neqeroorutinik taakkununnga annertunerusumik naleqqussagaallutik aaqqissuunneqartunik pisarnissaat sulissutigisariaqarlutigu” Naalakkersuisoq Martha Abelsen oqarpoq.

Isumaginninnikkut aarlerinartorsiortunut angerlarsimaffeqanngitsunullu sullissinerit aallartinneqartut patajaallisarneqarnissaannut isumassarsiorniarluni Naalakkersuisoq ulluni kingullerni pingasuni Danmarkimi kaajallaalluni angalaarpoq.  Ilaatigut Mændenes Hjem (Angutit angerlarsimaffiat), Kofods Skole, Sociolancen (Region hovedstadimi isumaginninnikkut peqqissutsikkullu suliniutit ataatsimoorussat) Naalakkersuisup Martha Abelsenip pulaarsimavai kiisalu Rådet for Socialt udsatte i Danmark-ip (Danmarkimi isumaginninnikkut aarlerinartorsiortut pillugit isumalioqatigiissitaq) allattoqarfianik oqaloqatiginnissimalluni.

 

Isumaginninnikkut peqqissuunissamullu neqeroorutit siammakkat

Peqqissuunissaq pillugu siunnersuisoqartarnera, siamasissumik kigutileritinnissamik neqerooruteqartoqartarnera, isumaginnittoqarfimmit suleqatigiit suliffik qimallugu sulisarnerat aamma innuttaasut ornillugit atornerluisuujunnarnissamik neqerooruteqartoqartarnera, paarlattuaniinngitsoq, Mændenes Hjemimi Kofods Skolemilu neqeroorutit ilisarnaatigaat.

 

“Kalaallit Nunaanni neqeroorutit takusartakkatta Danmarkimi Mændenes hjemimi aamma Kofods Skolemi neqeroorutigineqartut assigaat.  Ataaserli assigiinngissutigisaat tassaavoq neqeroorutit taakku pisortanillu neqeroorutit suleqatigiinnerisa qanoq issusaat.  Neqeroorutinut Kalaallit Nunaanni pigisatsinnut innuttaasut takkuttartut amerlanertigut ima aarlerinartorsiortigisuusarput, pisortat neqeroorutaannik atuisuujunnaarsimallutik imaluunniit atuinissaminnut naleqquttuusarnatik, Martha Abelsen oqarpoq nangillunilu:  “Aarlerinartorsiortunut suliniuteqarnitsinni ilaatigut neqeroorutitta sullinniakkatsinnut annertunerusumik aaqqissuunneqarnissaat naleqqussarneqarnissaallu ornissimasama uppernarsarpaat.  Uani isumaginninnikkut aarlerinartorsiortut angerlarsimaffeqanngitsullu pineqarput.”

 

Taamatuttaaq isumaginninnikkut aarlerinartorsiortut amerlassusiisa pinartumik napparsimavinni isumaginninnikkut peqqissaasunik atorfinitsitsisimaneq kingunerisimavaa, taakkulu napparsimasut napparsimavimmiinneranni peqqinnissamut sullissinermi isumaginninnikkullu sullissinermi akunnermiliuttuusarput. 

 

Inissiani pissutsit assigiinngisitaartut

Angerlarsimaffeqanngitsunut unnuisarfittut Mændenes hjem aamma Kofods Skole ingerlanneqarput angerlarsimaffeqanngitsunullu inissaqartitsillutik.  Neqeroorutit assigiinngisitaartorujussuupput ataasiakkaallu qanoq artorsartiginerannut annertuumik attuumassuteqarlutik.

“Unnuisarfiit assigiinngitsut amerlasuut takusarsimavakka taakkununngalu isumaliutersuutit tunngaviusut tusarsimallugit.  Suliniuteqaqqinnissatsinnut isumassarsianik pissarsiffiulluarsimapput.  Taamaattoq pingaarnerpaavoq piffinni pissutsinut naleqqussakkanik neqeroorutinik ineriartortitsinissaq” Martha Abelsen oqarpoq.

 
 

Attavissaq

Paasisaqarnerorusukkuit naalakkersuisup allattaa Inger Heilmann Larsen e-mailikkut: ihla@nanoq.gl imalulunniit oqarasuaatikkut + 299 554160-it attavigiuk