Naalakkersuisut Siulittaasuat Savalimmiunut pisortatigoortumik tikeraalerpoq

Naalakkersuisut Siulittaasuat Kim Kielsen ulluni 5. – 7. decembari Savalimmiunut tikeraassaaq pingaarnertut Savalimmiuni Naalakkersuisunut siulittaasunngortoq, Lagmand Bárður á Steig Nielsen oqaloqatigiartullugu.
Oqaloqatigiinnerit saniatigut aamma suliffeqarfiit assigiinngitsut paasisassarsiorfigalugit pulaarneqassapput.

Naalakkersuisut Siulittaasuat Kim Kielsenip ima oqaasertalerpaa:
”Aasaq Savalimmiuni qinersereernerup kingorna nutaanik Naalakkersuisoqalerput.
Aggustimi Lagmand nutaaq Bárður á Steig Nielsen, Islandimi kiisalu Finlandimi naapippara.
Isumaqatigiippugullu piffissami qaninnermi Savalimmiunut tikeraassasugut.
Nuannaarutigaaralu tikeraarnissaq maannakkut pisinnaammat.”

Suliffeqarfiit pulaarneqartussat tassaapput: Vagar Lufthavn, Atlantic Airways, Thorshavnimi ikuallaavik, Vónin kiisalu Oilwind.

Sisamanngorpat ualikkut Tinganes-imi Naalakkersuisut Siulittaasuat Lagmand-ilu ataatsimiissapput, ataatsimeereernerullu kingorna tusagassiortunik naapitsissapput.

Tikeraarneq naammassissaaq arfininngorpat ualikkut.

Attaveqarfissaq: Naalakkersuisut Siulittaasuannut allatsi Steve Sandgreen, stev@nanoq.gl , +299 596659