Inatsisitigut ataataqanngitsunut inatsisitigut siunnersuineq

Inatsisitigut ataataqanngitsut tarnikkut katsorsagaasinnaanerannut neqeroorutip saqqummiunneqarnerata kingorna inatsisitigut ataataqanngitsut arlallit ataatassarsiuussineq qanoq aallartinneqarsinnaanersoq pillugu ikiorneqarnissamik kissaateqarlutik saaffiginnissimapput. Maanna inatsisitigut siunnersorneqarsinnaaneq piviusunngorpoq.

Naalakkersuisut septemberip qaammataani inatsisitigut ataataqanngitsut tarnikkut katsorsagaasinnaanerannut neqeroorut saqqummiuppaat. Katsorsagaanissamut neqeroorut maanna inatsisitigut ataataqanngitsunut inatsisitigut siunnersorneqarnissamik neqeroorummik malitseqartinneqarpoq.

 

Inatsisitigut ataataqanngitsut eqqartuussivimmi ataatassarsiuinermik qanoq ilillutik aallartitsisinnaanertik pillugu apeqqutissaqarunik inatsisitigut maanna siunnersorneqarsinnaalerput. Inatsisitigut ataataqanngitsut 2014-imili ukuninnga pisinnaatitaaffeqarput:

  • ataatassarsiuinermik aallartitsisinnaapput
  • ataataminnit ilaqutaanillu kingornussisinnaatitaapput
  • ataatamik kinguliaqutaa tigusinnaavat

Inatsisitigut ataataqanngitsorpassuit pisinnaatitaaffitik imaluunniit ataatassarsiuinermik qanoq ilillutik aallartitsisinnaanertik ilisimasaqarfiginngilaat. Taamaattumik inatsisitigut ataataqanngitsut maanna inatsisitigut siunnersortinnermik neqeroorfigineqarsinnaalernerat Isumaginninnermut Inatsisinillu Atuutsitsinermut Naalakkersuisoqarfimmut Naalakkersuisup Martha Abelsenip assut nuannaarutigaa:

”Meeqqat inuusuttullu inatsisitigut ataataqanngitsut inuiaqatigiinnit arlaleriarlutik ilaginnarneqarlutik peroriartorsimanermik kingorna  unammillernartut qaangerniarnissaannut ingerlaqqinnissartillu pillugu ikiorneqarnissaat pingaaruteqarpoq. Taamaattumik tarnikkut katsorsagaasinnaanermut neqeroorut maanna inatsisitigut ataataqanngitsunut inatsisitigut siunnersortinneqarsinnaanermik malitseqartinneqarmat nuannaarutigaara. Qanoq ittunik pisinnaatitaaffeqarneq ilisimassallugu, aamma pisinnaatitaaffigisat tunngavigalugit iliuuseqarnissamut ikiorneqarnissaq pingaaruteqarpoq. Inuppassuit neqeroorutit marluusut iluaqutigiumaaraat neriuutigaara” oqarpoq Martha Abelsen.

 

Inatsisitigut ataataqanngitsutut tarnikkut katsorsagaanissamut innersuunneqarusulluni  oqarasuaatip normua sianerfigineqartartoq atorlugu inatsisitigut siunnersorneqarnissamut innersuunneqarsinnaapput. Inatsisitigut ataataqanngitsoq neqeroorutit oqarasuaatikkut normuanut pingaarnermut (34 50 50) sianerunik oqarasuaammut akisussaasunit akineqassapput, taakkulu inatsisitigut ataataqanngitsut inatsisilerituumut attaveqalersinnissaat isumagissavaat. 

 

Inatsisitigut siunnersortinneq akeqanngilaq, kisianni oqarasuaatip normuanut  sianerneq akeqarpoq. Oqarasuaammut akisussaasut inatsisitigut ataataqanngitsut sianerfiginissaannik neqeroorfigissavaat, taamaalillutik innuttaasut ataasiakkaat akiligassaat millisinneqassapput.   

 

Naalakkersuisut aamma Danmarkimi Social- og Indenrigsministeeriaqarfiup kiisalu Pitsaaliuinermik Isumaginninnermullu Aqutsisoqarfiup suleqatigiinnerisigut inatsisitigut ataataqanngitsunut inatsisitigut siunnersorneqarsinnaanermut neqeroorut pilersinneqarpoq. 

 

Inatsisitigut ataataqanngitsut inatsisitigut siunnersorneqarusuttut pingasunngornikkut oqarasuaat 34 50 50-imut nal. 16.00 - nal. 20.00 akornanni sianertassapput.

 

Paasisaqarnerorusukkuit facebookimi qupperneq ”Information om indsatserne til juridisk faderløse i Grønland” imaluunniit www.sullissivik.gl takusinnaavatit.

 

Attavissaq

Paasisaqarnerorusukkuit ministerip allattaa Inger Heilmann Larsen e-mailikkut ihla@nanoq.gl imaluunniit oqa. + 299 554160 attavigineqarsinnaavoq