Inunnut innarluutilinnut sammisaqartitsinermut aningaasarsiat qaffassasut

Ulluunerani ornittakkani, orniguttarfinni, sannavinni illersugaasuni imaluunniit suliffinni illersugaasuni inunnut innarluutilinnut immikkut suliffeqartinneqartunut sammisaqartitsinermut aningaasarsiaritinneqartartut 2005-ip kingornali iluarsiivigineqarsimanngillat. Tamanna maanna allanngortinneqartussanngorpoq. Aningaasarsiat pisortanit ikiorsiissutaasartut allat assigalugit siunissami ukiumoortumik iluarsineqartarnissaat qularnaarneqarpoq.

Inuit innarluutillit - sapinngisamik - inuiaqatigiinni innuttaasutut allatulli atugassaqartinneqartariaqarput. Taamaattumik inuit innarluutillit suliffeqalernissaminnut taamalu suliffeqarnermut ilaalernissaminnut ikorfartorneqarlutillu kaammattorneqarnissaat pingaaruteqarpoq. Innuttaasut sulisinnaassusaat tamakkerlugu atorfissaqartipparput – aamma innuttaasut innarluutillit immikkut sammisaqartinneqarlutik akunnialunni akunnerpassuarniluunniit sulisinnaassusiat ilanngullugu. Immikkut sammisassaqartinneqarluni suliffeqarneq innuttaasut innarluutillit inuunerisa pitsaanerulernerannut aamma ilapittuutaasinnaavoq.

Inuit innarluutillit ulluunerani ornittakkani, naapittarfinni, sannavinni illersugaasuni imaluunniit suliffeqarfinni illersugaasuni immikkut suliffeqartinneqartut siusinaartumik pensionisiamik saniatigut aningaasarsiaqartinneqartarput, saniatigut kaasarfimmiutut, suliffeqarnissamik neqeroorummik atuinissamik innuttaasumut kaammattuutaasutut isigineqartussamik. Aningaasarsiaritinneqartartoq 1. januar 2005-imit akunnermut 15 kr.-iusimavoq ingerlaavartumillu iluarsineqartarsimanani. Inuit innarluutillit tapersersorneqarnissaannut inatsisip nutaap atuutilerneranut atatillugu sammisassaqartinneqarnermut aningaasarsiat siunissami SIK-p isumaqatigiissutai malillugit akunnermut akissarsiap minnerpaaffiata 25 %-ianut aalajangersarneqartassapput. Taamaalilluni tamanna imatut isumaqassaaq sammisaqartitsinermut aningaasarsiat malunnartumik qaffariaateqassammata kiisalu ingerlaavartumik iluarsiivigineqartalerlutik. Erseqqinnerusumik oqaatigalugu sammisaqartitsinermut aningaasarsiat 1. januar 2020-mit atuutilersumik nalunaaquttap akunneranut 24,02 kr.-inut qaffanneqassapput, 1. april 2020-milu atuutilersumik nalunaaquttap akunneranut 24,57 kr.-inut qaffaqqillutik.

”Ukiut ingerlanerini inuit innarluutillit pitsanngorsaatissatut kaammattuutigisartagarpassuisa maanna Naalakkersuisunit naammassineqarsinnaasimanerat assut nuannaarutigaara. Sammisaqartitsinermut aningaasarsiat akissarsiatut isigineqaratik siusinaartumik pensionisianut tapertatut inooqatigiinnikkullu ataatsimoornermut peqataanissamut kaammattuutitut isigineqassapput”
Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen oqarpoq.

Attaveqarfissaq
Paasissutissat sukumiinerusut naalakkersuisup allattaa Inger Heilmann Larsen e-mailik-kut iihla@nanoq.gl imaluunniit oqarasuaatikkut + 299 554160 attaveqarfigalugu pissarsiarineqarsinnaapput.