Nuna tamakkerlugu upalungaarsimanermut pisortat pinngortitami ikuallannerit pillugit ataatsimeeqatigiinnerat

Aasaq Kangerluarsuk Tullermi nunarujussuarmi pinngortitaq aatsaat taama annertutigisumik sakkortutigisumillu ikuallappoq. Ukiuni kingullerni kommunit arlallit pinngortitami ikuallannernik, siornatigumut naleqqiullugu amerlanerusunik annerusunillu misigisaqarput.

Pinngortitami ikuallannerit kommuninit akisussaaffigineqarput, kisiannili aasaq Kangerluarsuk Tullermi ikuallannerup takutippaa, pinngortitami ikuallannerit ilaanni atortut immikkut piginnaanngorsakkat sulisullu kommunit tamarmik immikkut sulisuinit amerlanerusut atorfissaqartinneqartut.

Taamaattumik Pinngortitamut Avatangiisinullu Naalakkersuisoqarfiup sapaatit akunneranni kingullermi nunatsinni upalungaarsimanermut pisortat tamaasa pinngortitami ikuallannernut tunngasorpiaat pillugit Sisimiuni isumasioqatigiissippai. Upalungaarsimanermut Aqutsisoqarfimmiit immikkut ilisimasallit isumasioqatigiissitsinermut peqataapput.

Kommunit qanoq ilillutik pinngortitami ikuallannernik qatserinermi ikioqatigiissinnaanerat, aammalu pinngortitami ikuallannernut atortunik immikkut ittunik pisiniaqatigiissinnaanerat isumasioqatigiinnermi immikkoortutut pingaarutilittut oqallisigineqarpoq. Ilaatigut nunamut kapputtakkat, pinngortitami issuni qaleriinni itinerusuniittuni ikuallannernut qatserutitut immikkut sanaat pumpillu eqqortut atorfissaqartinneqarput.

Annertunerusumik paasisaqarusunnermi attaveqarfissaq:
Pinngortitamut Avatangiisinullu Naalakkersuisoqarfimmi pisortaaneq Mette Skarregaard Pedersen, tlf.: 529844 imaluunniit e-mail: pan@nanoq.gl