Nunatsinni meeqqanut suliniutinut aningaasanik NUTAANIK Naalakkersuisut immikkoortitsipput

Naalakkersuinikkut pissutsit pillugit oqaaseqartartoq Nauja Lynge allallu tusagassiorfinni arlalinni nunatsinni meeqqanut aarlerinartorsiortunut Danmarkip ikiorsiissutitut immikkoortitaanut tapertaasinnaasunik nunatsinni immikkut aningaasaliissuteqartoqarsimannginneranik oqaaseqarsimapput. Taamatut nalunaaruteqartarnerit tusatsiakkanik paatsuuinernillu tunngaveqartut Naalakkersuisoq Martha Abelsen oqarpoq.

Danmarkimi aningaasanut inatsisissap isumaqatigiinniutigineqarnerani Kalaallit Nunaanni meeqqat pillugit suliniutissanut piffissamut ukiunut 4-nut ukiumut 20 mio. kr.-inik immikkoortitsisoqarnissaa isumaqatigiissutigineqarpoq. Tamatumunnga atatillugu Naalakkersuisut akisussaaffitsik tiguaat nunatsinninngaanniillu aningaasalersueqataasoqarnissaa qulakkeersimallugu.

Meeqqat pillugit suliniuteqartoqarnissaanut nunatta peqataanera:
Naalakkersuisut Tasiilami Kalaallit Nunaatalu sinnerani isumaginninnermut suliassaqarfimmi suliniuteqarnerit patajaallisaaffiginissaannut atatillugu suliniutinut aalajangersimasunut aningaasanut inatsisissatut siunnersuummi aningaasanik immikkoortitsisimapput ukiumut 7,5 mio. kr.-it tikillugit amerlassuseqalersinnaasunik. Aningaasat taakku aningaasanut inatsimmi kontumi 20.11.50-imi immikkoortinneqarsimapput. Aningaasanut inatsimmut nassuiaatini takuneqarsinnaavoq sillimmatit taakku atugassanngortinneqarnissaannut tunngavissaatinneqassasoq tamanna sioqqullugu danskit oqartussaasuinik nunatta aningaasaleeqataanissaannik piumasaqaatitalimmik isumaqatigiissuteqartoqarsimanissaa, imaluunniit suliniutinut pilersaarummik akuerisamik suliaqartoqarsimanissaa. Suliniutit ingerlareersut suliniummut ataqatgiissaagaassapput ilanngunneqarlutillu.

”Aningaasanut inatsisikkut suliniarnermut akisussaaqataanerput takutikkatsigu assut nuannaarutigaara, peqataanissatsinnut aamma uagut soorunami pisussaaffeqarpugut” Naalakkersuisoq Martha Abelsen oqarpoq.

Meeqqanut sammititanik suliniutit eqqarsaatigalugit sipaarniartoqanngilaq:
Meeqqanut sammititanik suliniutini sipaarniartoqarsimaneranik nalunaarutaasartut taamatuttaaq eqqunngillat. Pitsaaliuinermut suliassaqarfik patajaallisarniarlugu aaqqissuussaanikkut allanngortitsisoqarsimavoq. Tamatumunnga atatillugu aningaasanut inatsimmi kontuni isumaginninnermut suliassaqarfimmut atugassiissutinik nikisitsisoqartarsimavoq sipaarniarnernut attuumassuteqanngitsunik. Kinguaassiutitigut atornerlunneqarsimallutik kingunerlutsitsisunik katsorsaallutik angalaqatigiittartut, meeqqanik katsorsaallutik angalaqatigiittartut, suliniutillu ilisimaneqartut allat allanngoratik taamatullu atugassaqartinneqarlutik ingerlaannassapput.

”Katsorsaanissamut neqeroorutit pitsaaliuinermilu suliniutit aallartinneqareersut ilisimaneqartullu ataqatigiissaarneqassapput. Ilaqutariit meeqqanik sumiginnaasarnerat akiorniarlugu iliuusissanut pilersaarut, ilaqutariinnut politikkissaq suliarineqartussaq aamma Inuuneritta III ilanngullugit suliniutit, katsorsaanissamik neqeroorutit pitsaaliuillunilu suliniutit Danmark peqatigalugu suleqatigiissutigineqassapput” Naalakkersuisoq Martha Abelsen oqarpoq.


Paasissutissat sukumiinerusut naalakkersuisup allattaa Inger Heilmann Larsen e-mailikkut ihla@nanoq.gl imaluunniit oqarasuaatikkut + 299 554160 attavigalugu pissarsiarineqarsinnaapput.