Angerlarsimaffinni persuttaasarnerit pillugit paqumigisaqarneq unittariaqarpoq

Ullumikkut ulloq tassaavoq Naalagaaffiit Peqatigiit nunarsuaq tamakkerlugu arnanut persuttaasarnerup unitsinnissaanut ullorititaat. Peqqissutsimut Isumaginninnermullu Naalakkersuisup Martha Abelsenip persuttaasarnerup nunatsinni angerlarsimaffinni amerlavallaarujussuartuni pisartup paqumigineqarnerata unitsinnissaa pillugu tamanut oqariartuuteqarluni ulloq malunnartinniarpaa.

Timikkut tarnikkullu persuttaasarneq nunatsinni annertuumik ajornartorsiutaavoq, amerlasuullu – ingammik arnat meeraallu – ullut tamaasa persuttaasarnerup misigeqqinnissaanut annilaangassuteqartarput.

Innuttaasunik misissuititsineq kingulleq malillugu arnat inersimasut taakkuupput persuttaanermik eqqorneqarnerpaajusartut. Kisitsisilli arnanut angutinullu tunngatillugu qaffasipput. Nunatsinni inersimasut tamarmiusut affaat sinnerlugit inuunermi ingerlanerani persuttaanermik siorasaarneqarnermilluunniit misigisaqarsimapput. Persuttaanerit tamatigut angerlarsimaffinni pisarput, persuttaasartullu quliugaangata arfineq-marluk maanna aappaapput imaluunniit siusinnerusukkut aappaasimallutik.
Arnat meerallit tallimaagaangata ataaseq sinnerlugu ukiuni kingullerni angerlarsimaffimmi persuttarneqarsimanngikkunik siorasaarneqarsimapput - tamatigullu meeqqat persuttaanermut isiginnittuusimassagunarlutik.

Persuttaanermut naaggaarta
Peqqissutsimut Isumaginninnermullu Naalakkersuisoq Martha Abelsen kisitsisinit aarlerinartunit aalassatsinneqarsimavoq, isumaqarlunilu tamatta persuttaasarnermut atornerluisarnermullu erseqqilluinnartumik akerliunerput takutittariaqaripput.
”Persuttaasarneq aappariinnermi imaluunniit angajoqqaat meeqqallu attaveqatigiinneranni ajornartorsiutinik aaqqiissutissatut qaqugumulluunniit akuerineqarsinnaanngilaq”.

”Arlaannattaluunniit persuttaasarneq nipangiinnarluta akuerissanngilarput, aamma angerlarsimaffinni persuttaasarnerit paqumigineqarnerat suli atuuttoq unitsittariaqarparput. Persuttaasarnermummi utoqqatsissutissaqanngilaq - aamma allamik soriarsinnaanngikkaanni” erseqqissaavoq Martha Abelsen.

Persuttaajuarnerit unitsinnissaannut ikiorneqarneq
Inunnut persuttarneqartartunut kiuinissamik inuiaqatigiit ineqerooruteqarput, persuttaasartullu aamma ikiorneqarsinnaallutik.
”Kikkut tamarmik Alliaq aqqutigalugu katsorsarneqarnissamik kissaateqartut ataasinngornerni sisamanngornernilu nal. 20.00-22.00 akornanni oqarasuaammut 34 50 40-mut sianernissaannik kajumissaarpakka, aamma inuit nunatsinni qimarnguiit ilaannut qimaallutik aamma siunnersorneqarnissamik pisariaqartitsisut taamaalioqqullugit, taakkunanimi arnat meeqqallu utaqqiisaasumik toqqissisimaffissarsisinnaapput illersorneqarsinnaallutillu.”

Paasissutissat:
 
Qimarnguiit:
Qimarnguik tassaavoq arnanut angutinulluunniit persuttarneqarsimasunut, persuttarneqarnissamik sioorasaarneqarsimasunut imaluunniit taamaaqataanik ilaqutariinnermut aappariinnermulluunniit atatillugu ajornartorsiuteqartunut utaqqiisaasumik najugaqarfik. Massakkut qimarnguiit arfineq-pingasuupput, nunalu tamakkerlugu persuttagaanermik eqqugaasimasunut nuna tamakkerlugu katsorsartinnissamik neqeroorut ataaseq.
Qimarnguik Naneruaq
E. Kristiansen Aqq. 9A/488
3952 Ilulissat
Oqarasuaat: 94 39 13 / 54 63 60

Illernit (Nuna tamakkerlugu katsorsartinnissamik neqeroorut)
Qeqertarsuaq
Oqarasuaat: 92 19 19

Saaffiginnittarfik Qarajaq
Killerpaat 35
3950 Aasiaat
Oqarasuaat: 89 10 06 / 53 57 60 / 53 57 60 (Ulloq unnuarlu saaffigineqarsinnaasut)

Qimarnguik Ukkaq
c/o Isumaginninnermut ingerlatsivik Kangaatsiaq
B-78
Postboks 80
3955 Kangaatsiaq
Oqarasuaat: 87 21 32 / 87 21 35 / 58 68 97 (nalunaaqutaq 16 kingorna – Isumaginninnermut pigaartoq)

Qimarnguik Nuuk
Sipisaq Kujalleq 7
3900 Nuuk
Oqarasuaat: 36 61 00 / 36 61 13 / 55 46 47 (Ulloq unnuarlu saaffigineqarsinnaasut)

Paamiuni Qimarnguik
Ortorsuup Aqq. B-681
3940 Paamiut
Oqarasuaat: 36 76 28 (ulluinnarni nalunaaqutaq 8-16) / 23 34 90 (Ulloq unnuarlu saaffigineqarsinnaasoq)

Saaffiginnittarfik ”Sikkersoq”
Kamikoorfik Blok G nr. 9
3920 Qaqortoq
Oqarasuaat: 49 38 35

Qimarnguik Ornitaq
Blok D 25
3921 Narsaq
Oqarasuaat: 53 11 82

Naaqqavi
Attertup Nuua B-1168
3913 Tasiilaq
Oqarasuaat: 36 77 86 / 56 01 54 (Pigaartup oqarasuaata)

Alliaq katsorsarneqarnissamut neqeroorutaavoq, tassani tarnip pissusiinik ilisimasallit inuit persuttaasartut allatigut oqaasinngortitsinissaannik ikiortarpaat. Neqeroorut kinaassutsimik isertuussiffiuvoq akeqaranilu. Alliaq oqarasuaat 34 50 40-ikkut ataasinngornermi sisamanngornermilu nal. 20.00 - 22.00-p akornanni sianerfigineqarsinnaavoq. Imaluunniit alliaq.gl iserfigalugu attaveqarnissamut immersugassaq immersorlugu.

Paasisaqarnerorusukkuit naalakkersuisup allattaa Inger Heilmann Larsen e-mailikkut: ihla@nanoq.gl imaluunniit oqa. +299 554160-mut attavigiuk