Arsummi angallannermi pissutsinut immikkut ittumik suliniuteqarnissaq

Arsummi talittarfik anorersuarnerani annertuumik ajoquserpoq, tamatumalu kingunerisaanik ilaasut niunissaat ikaarnissaallu isumannaakkunnaarmat Arctic Umiaq Line talissinnaajunnaarpoq. 4. december 2019-imi talinnissamut periarfissaqaqqilernissaa naatsorsuutigineqarpoq.

Ineqarnermut Attaveqaqatigiinnermullu Naalakkersuisoq Karl Frederik Danielsen oqarpoq:

”Arsummi talittarfiup ajoqusernerata kingorna ilaasunik angallassinerup qulakkeerneqarnissaanut suleqataasut tamarmik suleqatigiilluarnerat nuannaarutigaara. Innuttaasut Arctic Umiaq Line-mut ilaallutik angalanissaminnik kinguartitsinissamut taamaatitsinissamulluunniit periarfissaqanngitsut Disko Line-mut saaffiginneqqullugit kaammattorusuppakka.”

Ineqarnermut Attaveqaqatigiinnermullu Naalakkersuisoqarfik Namminersorlutik Oqartussat talittarfiutaata iluarsaanneqarnissaanik suliniuteqarluni aallartippoq, aammalu iluarsaassinerit novembarip naanerani aallartinneqarsinnaanissaat naatsorsuutigineqarpoq. Tamatuma kingorna silap ajunnginnissaa apeqqutaalluni iluarsaassigallarnerit ullunik pingasuniit sisamanut sivisussuseqarnissaat naatsorsuutigineqarpoq. Taamaalilluni talittarfik siusinnerpaamik 4. december 2019-ip kingorna atorneqaqqinneqarnissaminut piariissasoq naatsorsuutigineqarpoq.

Naalakkersuisoqarfimmiit Arctic Umiaq Line-p talinnissaanut periarfissat allat misissuiffigineqarput, taakkununngalu Suffi (Fortuna Havn) ilaavoq. Kisiannili Arctic Umiaq Line-mit nalunaarutigineqarpoq, taanna isumannaallisaanikkut naleqqutinngimmat ajoraluartumik periariarfissaanngitsoq.

Naalakkersuisoqarfimmiit innuttaasut piffissami pineqartumi angalanissaminnut bilitsisisimasut kaammattorneqarput, Arctic Umiaq Line-mut sukumiinerusumik paasiniaallutik attaveqaqqullugit, tassungalu angalanissamik kinguartitsisinnaaneq imaluunniit akiliutinik utertitsilluni taamaatitsisinnaaneq ilaatinneqarput.

Naggasiutigalugu ilisimatitsissutigineqarsinnaavoq, Naalakkersuisoqarfiup iluarsaassinissap saniatigut assartuussinissamik pisariaqartitsisoqarpat qulimiguulinnik angallassinerit ilaneqarsinnaanerat qulakkeermagu. Disko Line-miit qulimiguulimmik assartuussinissat ataqatigiissaarneqassapput, taamaattumillu innuttaasut assartuussinissamut periarfissat pillugit sukumiinerusumik paasiniaallutik Disko Line-mut attaveqassapput.

Annertunerusumik paasisaqarusunnermi Ineqarnermut Attaveqaqatigiinnermullu Naalakkersuisoqarfik box909@nanoq.gl aqqutigalugu attaveqarfigineqassaaq.