Aningaasanut inatsisip kinguartinneqarnissaanik Aqqaluaq B. Egedep kaammattuutaanut akissut

2020-mut aningaasanut inatsisip akuerineqarnissaa kinguartinneqaqqullugu Inatsisartunut ilaasortamit aammalu Aningaasaqarnermut Akileraartarnermullu Naalakkersuisuusimasumit Aqqaluaq B. Egedemit kaammattuutigineqarpoq.

2020-mi aningaasanut inatsisip tamat oqartussaaqataanerat tunngavigalugu Inatsisartunit akuerineqarpat tamanna ”innuttaasut tamat oqartussaaqataaneranni piginnaatitaaffii” tusarniarneqarnavianngitsut Aqqaluaq B. Egede isumaqarsimagunarpoq. Tamanna tamat oqartussaaqataanerannut allamik paasinneriaatsimik allarujussuarmik taaneqarsinnaavoq. Inatsisartuni amerlanerussuteqartut tamat oqartussaaqataanerat tunngavigalugu toqqaapput, – aammalu Aqqaluaq B. Egede taama paatsuunganartigisumik oqaaseqarnermigut tamat oqartussaaqataanerat tunngavigalugu suliat qanoq ingerlanneqarnissaat Aqqaluaq B. Egedep Naalakkersuisuusimasutut annertuumik ilisimasaqarfigisussaagaluarpaa.

Nunatsinni tamat oqartussaaqataanerat Inatsisartut Naalakkersuisullu akornanni suleqatigiinnissaq tunngavigalugu ineriartortinneqarpoq, aammalu innuttaasut tamat oqartussaaqataaneranni pisinnaatitaaffii inatsisini isumaqatigiissutinilu, tassungalu ilanngullugu Inatsisartut Naalakkersuisullu pillugit Inatsisartut inatsisaanni qulakkeerneqarput. ”IA-p oqaaseqartartuanut naammaginanngikkaluarpalluunniit inatsisit isumaqatigiissutillu malinneqarnissaat tamat oqartussaaqataanerannut attuumassuteqanngilaq, taakkumi suliaraagut aammalu malillugit sulilluta”, taama oqarpoq Aningaasaqarnermut Nunanilu Avannalerni suleqatigiinnermut Naalakkersuisoq, nangillunilu ”Aningaasanut inatsit inatsit atuuttoq naapertorlugu akuerineqarpoq aammalu aningaasanut inatsisip kingusinnerpaamik ulloq 21. november 2019-imi akuerineqarnissaa IA-p nammineq siulittaasuata ullualunnguit matuma siorna akuerseqataaffigaa.”

Aningaasanut inatsisip ukioq manna isumaqatigiinniutigineqarnerani IA peqataatinneqanngitsoq Aqqaluaq B. Egedemit aamma oqaatigineqarpoq, tamatumani pineqarluni ”suliap matoqqasumik ingerlanneqarneranik” oqarnermik. ”Sallaatsumik oqarlanga aningaasanut inatsisip isumaqatigiinniutigineqarnerani peqataanissamut periarfissamini IA ataatsimiinnerni marlunni peqataammat” taama oqarpoq Aningaasaqarnermut Nunanilu Avannarlerni suleqatigiinnermut Naalakkersuisoq Vittus Qujaukitsoq. Partii isumaqatigiinniarnerit pillugit ataatsimiinnerni marlunni taakkunani saqqummiussassaqarnani takkuppoq. ”Ukioq manna aningaasanut inatsimmut IA akisussaaqataanissamut piumassuseqanngitsoq siusissukkut paasinarsivoq.” Isumaqatigiinniarnerit naammassineqassappata soorunami tatiginneqatigiilluni ingerlanneqartussaapput – tamannalu Naalakkersuisunut ilaasortaasimasumit ilisimaneqartariaqarpoq. Aqqaluaq B. Egede Aningaasaqarnermut Naalakkersuisuugallarmat pissutsit aamma taamaapput. Isumaqatigiinniarnerit ingerlanneqarnerini Naalakkersuisut allannguutissatut siunnersuutinik saqqummiussinissaat utaqqimaarniarlugu IA-p kissaatigigamiuk IA aalajangersimasunik piumasaqaateqarnanilu kissaateqanngilaq. ”Nunatsinni tamat oqartussaaqataaneranni ajuusaarnartoq tassaavoq nunatsinni illuatungiliuttutut partii annerpaaq iluareqqusaarneq tunngavigalugu neriorsuuteqarneroqqusaannermik saqqummiussuinermut siuttuulerpoq.”

”IA-p naalakkersuinikkut apeqqutinut arlalinnut Inatsisartunit amerlanernit allaanerusumik isiginninnera soorunami inatsisitigut tunngavissaqarpoq; taamaattorli Inatsisartuni tamat oqartussaaqataanerat tunngavigalugu pisarnertut suleriaatsip apeqqusernissaa ingasappallaarpoq” ilanngullugu oqarpoq Vittus Qujaukitsoq.

Erseqqissaatitut aamma paasissutissiissutigineqassaaq 2020-mut aningaasanut inatsit ulloq 21. november 2019-imit kingusinnerusukkut akuersissutigineqassappat tamatuma kingunerissammagu akileraartarnermut kortit piffissaq eqqorlugu nassiussuunneqarsinnaanngimmata – tamannalu pissutigalugu suliffeqarfiit innuttaasullu ukiup nikinnissaani atugaat akuerineqarsinnaanngilluinnartumik akornuserneqassammata.

Attavissaq: Naalakkersuisumut allatsi Bolethe Rasmussen, bora@nanoq.gl