Tillie Martinussenimut aamma aningaasanut inatsisip allatut aningaasalersorneqarsinnaaneranut oqaaseqaat

Penge

Suleqatigiissitsisut Inatsisartunut ilaasortaatitaat Tillie Martinussen aningaasanut inatsimmut isumaqatigiissutip imarisaannut tunngatillugu allatut aningaasalersuinissamut periarfissaasinnaasunik, tusagassiuutitigut nalunaarummi tikkuaavoq.

 

Aningaasaqarnermut Nunanilu Avannarlerni suleqatigiinnermut Naalakkersuisup Vittus Qujaukitsup tassunga atatillugu oqaatigaa: ”Aningaasanut inatsimmut isumaqatigiissutip imarisai immikkoortuni ataasiakkaani allaanerusinnaagaluartut, Tillie Martinussenip oqaatigigamiuk soorunami ilumoorpoq. Tamatumunngami nammineerluni isumaqatigiissuteqarnermi peqataalluni naleqquttumik immersueqataasimasinnaagaluarpoq. Taamatut aalajangersimasumik sunniuteqarnissaq anguneqartarpoq.”

 

Vittus Qujaukitsup ilannguppaa, siunnersuutit isummersornerillu Tillie Martinussenip tusagassiuutitigut nalunaarummi saqqummiussai, ajoraluartumik pissusiviusunik naleqquttumik nassuiaatinut naapertuuteqqajanngitsut.

 

Inatsisartunut ilaasortanut Nuummi aalajangersimasumik najugaqartuunngitsunut ineqarnermut tunngasunik pitsanngorsaanerit naleqqunnersut soorunami oqallisigineqarsinnaajuaannarpoq – kisianni taamatut suliniuteqarnerup, tassaasup sanaartornermut aningaasaliissutit – tassani aningaasat ataasiaannarluni pisussat – atorunnaarsinnera, suliap pissusissamisoornera malillugu, assersuutigalugu akitsuutinik iluarsiinertut ittunik, ingerlaavartumik isertitassanik taarsiisinnaanngilaq. Aammalu Inatsisartunut aningaasartuutissat aammattaaq Naalakkersuisut pingaarnersiuineranni ilaatinneqartanngillat. Taakkua Inatsisartut kisimik siunnersuutigisarpaat – akuerisarlugillu. Isumaqarnarpoq Suleqatigiissitsisut siuttuata Inatsisartut aamma Naalakkersuisut assigiinngissutaat ilisimasariaqaraluaraa.

 

Ilanngaassivik suliniutaavoq innuttaasut pisortanut akilinngitsuukkanik akiitsoqarnerup malitsigisaanik aningaasaqarnikkut pitsaanngitsumik inissisimalernissaannik pitsaaliuinissamut tunngassuteqartoq. Nunatsinni akiitsut akilinngitsuukkat ajornartorsiutaapput, tamannalu arlaannaataluunniit miserratigisinnaanngilaa. Periaatsip pilersinneqarneranut atatillugu aningaasartuuteqartoqartussaavoq; kisianni naatsorsuutigineqarpoq taakkua ukiualuit ingerlaneranni imminut akilerumaartut. Erseqqissaatitut oqaatigineqassaaq pilersitsineq 29 mio. koruunit missaannik akeqassasoq naliliisoqarmat, aammalu Tillie Martinussenip oqaatigisaatut 135 – 150 mio. koruuninik akeqartussaanani. Tillie Martinussenip oqaatigisai kisitsisit taakkua ilumuunngilluinnarput. Aammalu Ilanngaassiviup taamaatinneqassappat, tamanna Nunatta Karsiani aningaasalersuinermut pisariaqartitsinerup annertunerulerneranik kinguneqartussaavoq.

 

”KNI-mut aningaasartuutissat 45 mio. koruunit Tillie Martinussenip tusagassiuutitigut nalunaarummini oqaatigaa. Nassuerutigisariaqarpara tamatumani sunarpiaq pineqarnersoq sumilluunniit sianiginnginnakku.” Vittus Qujaukitsoq oqarpoq. Aamma tassani kisitsisit piumasarsuutaapput.

 

Vittus Qujaukitsoq naggasiivoq: ”Suleqatigiissitsisut siuttuat tamat oqallinneranni peqataaqqullugu, aammalu kisitsisit periarfissamut nassaarineqartut tunngaviginagit, pissusiviusunik tunngavilimmik politikkikkut oqalliseqataaqqullugu kaammattussavara. Tamanna Inatsisartuni aammalu Inatsisartut avataanni atuuppoq.

 

Inussiarnersumik inuulluaqqusillunga

 

 

Vittus Qujaukitsoq

 

 

Attaveqarfissaq: Naalakkersuisup allattaa Bolethe Rasmussen, bora@nanoq.gl