Angajoqqaat meeqqaminnik sumiginnaasarnerat akiorniarlugu nuna tamakkerlugu Naalakkersuisut iliuusissanut pilersaarutaata tamanut saqqummiunneqarnera

Meeqqanut- ilaqutariinnullu suliassaqarfimmut oqartussaasoqarfiit assigiinngitsunik suliallit akornanni suleqatigiilluni siunissaq ungasinnerusoq eqqarsaatigalugu iliuusissanut pilersaarut pilersaarutaavoq. Piffissami 2020-imiit 2030-imiut kommunit sullissinerat iliuusissanut pilersaarutip patajaallisassavaa, taamaalilluni meeqqat taakkulu ilaqutaat pitsaanerusumik tapersersorneqarsinnaaniassammata ikinnerusullu sumiginnagaallutik peroriartorsinnaaniassammata.

Meeqqat ilaqutariinni isumassuiffiusuni peqqissumik toqqissisimanartumillu avatangiiseqarlutik peroriartornissaat iliuusissanut pilersaarutip qulakkiissallugu siunertaraa. Ilaqutariinnut aarlerinartorsiortunut iliuusissanut pilersaarut sammiveqarpoq, kisianni aamma suliniutit tamanut atuuttut amerlasuut, meeqqanut- ilaqutariinnullu suliassaqarfimmi ilaqutariinnik tamanik kivititsissutaasusat imaralugit.

Iliuusissanut pilersaarutip pitsaaliuineq tamakkiisumik isiginnittoq aallaavigaa, tassani kikkut tamarmik suliaat ataqatigiissaarneqassallutik, kikkullu tamarmik kivitseqataassallutik, taamaalilluni oqartussaasoqarfiit assigiinngitsunik suliallit akornanni suliniutit naammassineqarsinnaaniassammata.

Tamakkiisumik isiginnilluni meeqqamut ilaqutaanullu ukkatarinninnerup, siusissumik iliuuseqarnerup pitsaaliuinerullu pitsaanerusumik sunniuteqarnissaa qulakkiissavaa. Naggataagummi ilaqutariinni ataasiakkaani unammilligassat pinngortarput, taammaammat tassani pitsaaliuineq misileqqaassavarput.

“Ullumikkut meeqqat pisinnaatitaaffii pillugit isumaqatigiissutip ukiunik 30-inngortorsiornera malunnartinniarparput. Ullut ilanni isumaqatigiissutip malinneqarnissaa anguniarlugu ullut tamaasa suliaqartarpugut. Aqqutitsinni iliuusissanut pilersaarut allariarneruvoq annertooq, aamma meeqqanut- ilaqutariinnullu suliassaqarfimmi unammilligassat aalajangersimasut aaqqiiviginissaat taassuma siunertaraa.

Iliuusissanut pilersaarutip suut tamaasa ingerlaannaq aaqqiiviginavianngilai, kisianni suliassami meeqqap pisariaqartitaata siulliunneqarnissaat pillugit ukiuni tulliuttuni amerlasuuni ataatsimoorussamik sammiveqarluta suleqatigiinnissatsinnut ilapittuutaassalluni”. Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen oqarpoq.

Iliuusissanut pilersaarut sammisanik annertunerusunik tallimanik aamma ukiuni arlaqartuni suliniutinik katillugit 32-inik atuuttussanngortinneqartussanik imaqarpoq:

  • Meeqqanut – ilaqutariinnullu suliassaqarfik qanittoq pitsaaliorfiusorlu: Meeqqanut ilaqutariinnullu sullissiviit sinaakkutissaliuunnerisigut pitsaaliuinermik suliniuteqarnerup patajaallisarneqarnerata immikkut ittumik ukkatarineqassaaq. Angajoqqaat amerlanerit angajoqqaatut piginnaasaqarnissaq pillugu pikkorissaanerni peqataasassapput.
  • Ilorrisimaarnerulerneq neqeroorutillu amerlanerusut: Sunngiffeqarnermut suliassaqarfiup patajaallisarneqarnera aamma ilorrisimaarnerup ukkatarineqarnerata annertusineqassaaq
  • Oqartussaasoqarfiit assigiinngitsunik suliallit akornanni suleqatigiinneq patajaallisarneqassaaq: Nunamut tamarmut sinaakkusiineq ilitsersuinerlu aqqutigalugit kommunini oqartussaasoqarfiit assigiinngitsunik suliallit akornanni suleqatigiinnerup patajaallisarneqassaaq
  • Qarasaasiaq atorlugu suleriaaseqalersitsineq, ilisimasat nalilersuinerlu: Siunissami meeqqanut- ilaqutariinnullu suliassaqarfik pillugu paasissutissanik ilisimasanillu amerlanerusunik peqalernissaq qarasaasiamik atuinerulernerup qulakkiissavaa, taamaaliornerullu Naalakkersuisut Inatsisartullu pitsaanerusumik aalajangiisarnissaannut tunngavissaqartilissavai.
  • Piginnaasanik ineriartortitsineq, ilinniaqqinnerit-/ ilinniagaqaqqinnerillu sulisunillu attassiinnarneq: Isumaginninnerup iluani suliaqarnissamut ilinniakkat patajaallisarneqassapput aamma sulisooreersunik ilinniartitseqqinneq- / ilinniagaqartitseqqinnerlu ingerlanneqassalluni.
”Sumiginnaanerup akiorneqarnissaa suliassaavoq ajornakusoortoq piuminaatsorlu, inuiaqatigiittut ataatsimoorluta ukiuni arlalinni kivitseqatigiinnissatsinnik piumasaqaatitalik. Sukkasuumik sapernaatsumillu aaqqiivigineqarsinnaanngitsoq. Meerartatta isumassorneqarnissaasa qulakkeerneqarnissaanut tamatta suleqataassaagut, qularutiginngilaralu iliuusissanut pilersaarut pitsaasumik tassunga sunniuteqarumaartoq” . Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen oqarpoq.

Meeqqanik sumiginnaasarneq akiorniarlugu nuna tamakkerlugu iliuusissanut pilersaarut Naalakkersuisut ilaqutariinnut politikkianut takkuttussamut, meeqqat ilaqutaasalu sullinneqarnerannut pingaarnertigut anguniakkanik siunnerfilimmut ataneqartillugu isigineqassaaq. Taamatuttaaq inuttaasut peqqinnissaannut pilersaarummut Inuuneritta III-mut ataneqartillugu iliuusissanut pilersaarut isigineqassaaq, tassani, peqqinnissamut siuarsaatitut suliniutit tamanut atuuttut ukkataralugit, meeqqat inuunerannik nalinginnaasumik pitsanngorsaasoqarnissaa siunertaarineqarpoq. Taamatuttaaq nunamut tamarmut periusissiat soorlu Killiliisa aamma Meeqqat 0 – 18 iliuusissanut pilersaarut ikorfartussavaat.

Angajoqqaat meeqqanik sumiginnaasarnerat akiorniarlugu nuna tamakkerlugu iliuusissanut pilersaarut 2020-2030

Attaveqarfissaq
Paasisaqarnerorusukkuit ministerip allattaa Inger Heilmann Larsen ugguuna ihla@nanoq.gl-ikkut imaluunniit tlf. + 299 554160 atorlugu attavigiuk