Naalakkersuisut Siulittaasuata oqalugiaataa

Meeqqat pisinnaatitaaffii pillugit Naalagaaffiit Peqatigiit Isumaqatigiissutaanut Kalaallit Nunaata akuersisimaneranut uppernarsaaqqinneq

Asasakka meeqqat, maanilu inersuarmi najuuttusi,

Naalagaaffiit Peqatigiit meeqqat pisinnaatitaaffii pillugit isumaqatigiissutaata ukiunik 30-nngortorsiornera ullumi nalliuttorsiorparput. Ullumikkut nalliuttorsiornitsinni peqatigiiffiit, meeqqat inersimasullu taama amerlatigisut takkussimammata nuannaarutigaara.

Nunani assigiinngitsuni nunap siuttui isumaqatigiissummut uppernarsaaqqinnerisigut ullumikkut ulloq malunnartinneqarpoq. Uppernarsaaqqinneq isumaqatigiissutip pingaaruteqassusaanik naqissusiineruvoq pingaarutilik. Kalaallit Nunaat sinnerlugu isumaqatigiissummut akuersineq uppernarsarsinnaagakku tulluusimaarutigaara, meeqqallu pisinnaatitaaffii pillugit Naalagaaffiit Peqatigiit isumaqatigiissutaata malinneqarnissaa noqqaassutigiuassavarput.

Meeqqat inersimasutulli pisinnaatitaaffeqarput. Meeqqalli immikkut ittumik illersugaanissaat pingaaruteqarpoq, taamaattumillu aamma namminerisaminnik pisinnaatitaaffeqarput. Uagut – angajoqqaat, inersimasut – meeqqat pisinnaatitaaffiisa malinneqarnissaat qulakkiissallugu akisussaaffigaarput.

Isumaqatigiissut 1993-imili naalakkersuinikkut akuersissutigaarput taamaalillutalu ukiorpassuarni peqataaffigalutigu. Ajoraluartumik nunatsinni suli meeraqarpoq, inuunerup artornartuinik misigitinneqartunik. FN-p anguniangai suli tamakkinngilagut, suliatsinnili ilannguttuarpagut.

Meerartatta tamarmik meeqqatut meeraaneq misigissangaat qulakkeerniagassaraarput ataatimoorluta. Qujamasuutissaavoq meeqqat atugaat piffissami kingullermi pitsanngoriaateqarsimanerannik takussutissaqarmat. Ineriartornerli unittuussanngilaq, meerartattami toqqissisimallutik peroriartornissaat qulakkeerniassallugu suliassaqaqaagut.

Ullumi nalliuttorsiutiginninneq sulinerup nanginneqarnissaata pingaaruteqassusianik malunnartitseqataavoq. Nunami maani meeqqanut pisinnaatitaaffiit pitsaanerulersinnaapput aamma pitsaanerulissapput. – Tamanna qulakkeerniarlugu tamatta ikioqatigiinnikkut pisussaaffigaarput.

Peqatigiiffippassuit ullumi maani najuuttut, meeqqat pisinnaatitaaffiinik suliniuteqarnikkut maligassiuisut, minnerunngitsumillu Meeqqat Illersuisuat MIO-lu suliaat pillugit nersualaarpakka, qujaffigalugillu. Tamassilu pilluaritsi.

Qujanaq!