Meeqqat piginnaatitaaffimminnik ilisimasaqarnissaat kiisalu eqqunngitsuliorfigineqaraangamik suaarutiginnittarnissaat pingaaruteqarpoq

Naalagaaffiit Peqatigiit meeqqanut ullorititaata ukiunik 30-inngortorsiornerata malunnartinneqarneranut atatillugu Kalaallit Nunaanni meeqqat amerliartuinnartut meeqqat pisinnaatitaaffii pillugit isumaqatigiissut ilisimalermassuk nalunagulu eqqortinneqartussaasunik pisinnaatitaaffeqarlutik, Isumaginninnermut Inatsisinillu Atuutsitsinermut Naalakkersuisup Martha Abelsenip nuannaarutigaa.

 

Ingerlavugut – kisiannili anguniagarput suli ungasippoq
Kalaallit Nunaata 1993-imili meeqqat pisinnaatitaaffii pillugit isumaqatigiissut atsiormagu taamaalillunilu nunami meeqqanut pissutsit pitsanngorsarneqarnissaannik siunertaqarneq takutillugu, Martha Abelsenip tulluusimaarutigaa:

- Isumaqatigiissutip malinneqarnissaa ullut tamaasa sulissutigaarput.  Taamaattoq Kalaallit Nunaanni meeqqat tamarmik toqqissisimasumik peqqissumillu inuuneqarnissaannut – eqqunngitsuliorfigineqaratik kannguttaatsuliorfigineqaratillu inuuneqarnissannut – anguniagarput suli ungasippoq.

 

- Meeqqat pisinnaatitaaffii pillugit meeqqat amerlanerusut – inersimasullumi taakku avataanniittut – pisinnaatitaaffiit taakku pillugit ilisimasaqalermata immikkut nuannaarutigaara.  Akisussaaffik inersimasut tigummivaat, kisianni pisinnaatitaaffitsik unioqqutinneqarpata, taava taamaaliortoqarnera suaarutigissagamikku meeqqat nalussanngilaat.


Meeqqat siunnersuisoqatigiivi
NAKUUSA, Kalaallit Nunaanni Namminersorlutik Oqartussat UNICEF Danmarkillu suliniut suleqatigiissutigisaat, kommunini tamani kiisalu Tasiilami meeqqat siunnersuisoqatigiivinik pilersitsisimavoq.  Ilaatigut meeqqat pisinnaatitaaffii pillugit isumaqatigiissummi meeqqat ilanngunneqarnissaminnik oqartussaaqataanissaminnillu – aamma najukkaminni – pisinnaatitaaffiisa qulakkeerneqarnissaat pillugit meeqqat siunnersuisoqatigiivi pilersinneqarput.

 

Meeqqat pisinnaatitaaffii pillugit isumaqatigiissut ukiunik 30-inngortorsiorpoq
Meeqqat pisinnaatitaaffii pillugit Naalagaaffiit Peqatigiit isumaqatigiissutaat 1989-imi Naalagaaffiit Peqatigiit ataatsimeersuarneranni akuersissutigineqarpoq, taannalu meeqqat inuttut namminersortutut politikkikkut, aningaasaqarnikkut inooqatigiinnermi kulturikkullu pisinnaaffeqarneranik imaqarpoq.  Isumaqatigiissutip atsioqataaffigineratigut isumaqatigiissutip malinneqarnissaanik nunat imminnut pisussaaffilerput.

 

Nalliuttorsiorneq nunarsuarmi tamarmi nunarpassuarni nalliuttorsiutigineqarpoq – aamma maani Kalaallit Nunaanni. Ullormi inuuissiorfimmi novemberip 20-ani Nakuusa Katuami aaqqissussaqassaaq, tassani Nakuusap meeqqanut siunnersuisoqatigiivisa meeqqat ataatsimeersuarnerannit kingullermit inassuteqaatai Naalakkersuisunut tunniunneqassallutik, tassanilu Naalakkersuisut Siulittaasuat isumaqatigiissummik uppernarsaaqqissaaq.

 

Tamatuma saniatigut UNICEF aamma NAKUUSA novemberip 27-iani aamma 28-iani kulturikkut illorsuarmi Katuami Nuummiittumi meeqqat pisinnaatitaaffii pillugit ataatsimeersuartitsissapput.  Ataatsimeersuarnermi ilaatigut Kalaallit Nunaata Meeqqat pisinnaatitaaffii pillugit isumaqatigiissut pillugu killiffia nalilersuiffigineqarumaarpoq.

 

 



Attaveqarfissaq

Paasisaqarnerorusukkuit ministerip allattaa Inger Heilmann Larsen ugguuna ihla@nanoq.gl-ikkut imaluunniit tlf. + 299 554160 atorlugu attavigiuk