Ukiumi maligassiuisuinik eqeersimaartunik toqqaaneq

Timip aalatinnerunissaa pillugu Paarisap unammisitsinerani ajugaasut toqqarneqarput. Katuami arfininngornerup unnukkuani Maligassiuisut Aliikkusersuineranni ukiumi atuarfiit, suliffeqarfiit innuttaasutullu eqeersimaartutut nersorneqarput nersornaaserneqarlutillu.

Timersornermi peqqissutsimilu maligassiuisunut Paarisap, Kalaallit Nunaanni Timersoqatigiit Kattuffiata aamma Elite Sportip nersornaasiineri Maligassiuisut Aliikkusersuineranni tunniunneqarput. Nersornaasiineq nipilersornernik qitinnernillu arlalinnik aliikkusersuinertaqarpoq. Aliikkusersuineq KNR TV-mi toqqaannartumik takutinneqarpoq.

Peqqissutsimut, Isumaginninnermut, Inatsisinillu Atuutsitsinermut Naalakkersuisup Martha Abelsenip Ukiup atuarfianut eqeersimaartumut nersornaasiivoq oqaaseqarlunilu:

- Suliniutit pitsaasut erseqqissaavigissallugit nersussallugillu pingaaruteqarpoq, uagutsinnut allanut annertuumik isumassarsiaqarfiulluarsinnaammata. Timersornerup salliutittarneratigut timersornermullu atatillugu ataatsimooqatigiittarnermik pingaartitsineq pissarsiaqarnarluartoq ukiup eqeersimaartuisa takutippaat. Allat peqatigalugit eqeersimaartunik isumalimmillu iliuuseqarutta, timerput kisiat nukittunerulersissanngilarput, kisianni aamma sianissutikkut peqqinnerput, ilorrisimaarnerput aamma inuunermi naleqartitagut ilanngullugit pitsaanerulersissavagut.


Ukioq manna atuarfik eqeersimaartoq tassaavoq Niaqornaarsummi Atuarfik Kristian Lundblad. Atuarfiup takutippaa timip aalatinnerata suliniutinut allanut peqatigitillugu ingerlannera qanoq iluatsinneqarsinnaasoq. Timip aalatinneqartarneranik avatangiisinillu eqqumaffiginninneq pingaartillugit atuarfiup iliuuseqartarnera atuarfiup atuartuinut sulisuinullu taamaallaat iluaqutaaginnanngilaq, nunaqarfimmulli tamarmiusumut iluaqutaavoq, tikikkuminartuunissarlu pillugu nunaqarfiup ataatsimoorullugu anguniagaanut tapersiutaalluni.

Ukioq manna suliffeqarfik eqeersimaartoq tassaavoq Nanortalimmi Utoqqaat Illuat, sulisut najugaqartullu timiminnik aalatitsinerunissaanik anguniagaqartoq. Nanortalimmi Utoqqaat Illuanni najugallit meeqqat meeqqerivimmeersuut pisuttuaqatigigaangatigit Nanortalimmi innuttaasut nukarlersat utoqqaanerpaallu naapittarput. Inuuneq tamaat timip aalatinneqarnissaa pingaaruteqartoq, kinguaariikkuutaallu akornanni ataatsimoorluni timimik ataatsimoorluni aalatitsineq naapinnernik pitsaasunik pilersitsisartoq ukiup suliffeqarfiata eqeersimaartup takutippaa.

Inuiaqatigiinni ukioq manna eqeersimaartoq tassaavoq Marîna Anthonsen, Nanortalimmi qitinnermut klubbimik : “Nanortalimmi tapartartuaqqat”-nik aallartitsinermik suliniuteqarsimasoq. Klubbimi kikkut tamarmik inuusuttut utoqqaallu tikilluaqqusaapput. Qitinnermik nuannarisaqarneq siammarterniarlugu qitittalerniarlutik aallartinniartunut tamanut ilitsersuinermut filmi qitinnermut klubbip suliarisimavaa. Inuiaqatigiinni timimik aalatitsinerunissaq siuarsarniarlugu suleqataanikkut aamma innuttaasutut qanoq ililluni annertuumik allanngortitsisoqarsinnaasoq Marîna Anthonsenip takutippaa.

Ajugaasut tamaasa Paarisap pilluaqquai. Ukiup eqeersimaartui pillugit filmeeraliat Peqqik.gl-imi takusinnaavatit – imaluunniit takoqqissinnaavatit.

Paasisaqarnerorusukkuit peqqissutsimut sulianut siunnersorti Kista Hammeken Lennert oqarasuaatikkut +299 34 66 12 imaluunniit e-mailikkut khle@nanoq.gl attavigineqarsinnaavoq.