Naalakkersuisoq kulturikkut sulianut aningaasaliivoq

Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisup, Ane Lone Baggerip, 2019-imi qinnuteqaateqartitsinermi kingullermut atatillugu suliniutinut assigiinngitsunut 41-nut katillugit 3.564.484,00 koruuninik tapiissutinik agguaassivoq. Aningaasat agguaanneqartut aningaasaliiffinniit, ataani pineqartuniit, sisamanit agguaanneqarput.

Tassunga atatillugu Ane Lone Bagger ima oqarpoq: “Nuannaarutigaara piukkunnartorpassuarnik, tusarnaartitsinerniit sinarissami isiginnaartsinerniillu fimiliornermut atuakkanillu saqqummersitsinissamut, qinnuteqartoqarmat. Inuiaqatigiinni kulturikkut eqeersimaartoqarneranik ersersitsivoq. Erseqqissarusuppara juullerpalaartunik, piffissami takkuttussami amerlasuunut juullimut tipaatsunnermik pilersitsisussamut, tusarnaartitsinissanut qilanaarnera naatsorsuuteqarneralu.”

Kulturimut aningaasaliissutit
Kultureqarnermut aningaasanit suliniutinut assigiinngitsunut 14-inut 1.106.000 koruuninik tapiissutinik tunniussisoqarpoq. Taakkunannga taperneqarput Qajaq Qaqortup tusarnaartitsinermik aaqqissuussaa, sinerissami Josef Lund Josefsenip Kuunu Berthelsenillu immikkut juullerpalaartumik tusarnaartitsinissaat , isiginnaartitsinerit assigiinngitsut sisamat meeqqanullu atuakkanik marlunnik saqqummersitsinerit taakkunani ataaseq Inuuteq Storchip John Møller pillugu assiliartalimmik atuakkiaa.

Aningaasat inunnit ataasiakkaanit, kattuffinnit il.il. suliaminnut suliniutiminnullu atatillugu qinnutigineqarsinnaapput, pingaartumillu aningaasarsiutigalugu eqqumiitsuliortut ingerlataannut suliniutaannullu suliniutinullu allanut eqqumiitsuliornikkut qaffasissusilimmik suliaasunut aningaasat tunniunneqarnerusarput. Tamatuma saniatigut timersoqatigiiffiit peqatigiiffinni aaqqissuussinernut atatillugu eqqumiitsuliortunik suleqateqarnerminni, eqqumiitsuliortut angalanerinut aningaasartuutaasa matussutissaannik tapiissutissanik qinnuteqaateqarsinnaapput.

Filmiliornermik ingerlataqartunut aningaasaliissutit
Filmiliornermik ingerlataqartunut aningaasaliissutinit filmiliornermik pilersaarutinut aqqanilinnut katillugit 1.552.000 koruuninik tapiissutinik tunniussisoqarpoq. Taakkunannga asanninnelersaarut quiasaarusiarlu “Ukiutoqqami Pilluaritsi” kiisalu nunat assigiinngitsut suleqatigiiffigalugu piviusulersaarut, Anorak Film I/S-imit suleqataaffigineqartoq tapertippoq. Taakkua saniatigut eqqumiitsuliortup Ane Lena Fussing Rosbachip nerisassiornermik isiginnaagassiaa “Avannaani Iganiarta qanga ullumilu” aamma tapertippoq.

Filmiliornermik ingerlataqartunut aningaasanit kalaallit filmiliornermik pilersaarutaannut tapiissutinik qinnuteqartoqarsinnaavoq, pingaartumik oqaluttualiornernut piviusuliornernullu.

Atuakkat kalaallisoortunut aningaasaliissutit
Atuakkanut kalaallisut allatanik tapiissutaasartunit, suliat arfinillit katillugit 506.920 koruuninik agguaassiffigineqarput. Taakkuupput Simon “Aqqaluk” Olsen ilisaritillugu atuakkiaq, oqaluttuarisaaneq pillugu atuagaq, oqaluttualiaq, Ole Brandtip atuakkiaata “Taseraq Pingajuallu”-p saqqummerseqqinnera, meeqqanut tupilannik qalipagassiatut atuakkiaq kiisalu qaammat pillugu meeqqanut atuagaq.

Qinnuteqartoqarneratigut atuakkanut kalaallisuunut tapiissuteqartoqartarpoq. Taassuma saniatigut atuakkianut kalaallisut nutserneqarsimasunut aningaasanik tapiisoqarsinnaavoq. Qinnuteqaateqartup Kalaallit Nunaanni najugaqartuunissaa tapiissuteqartoqassappat piumasaqaataavoq. Tamatuma saniatigut aningaasaliissutit sammisaqartitsinernut allanut atorneqarsinnaapput, assersuutigalugu atuakkat immiussat saqqummersinneqarnerinut, atuakkiortunngortussat pikkorissarnerinut allanullu.

Kulturimik sulialinnut aningaasaliissutit
Taakkua qaavisigut kulturimik sulialinnut qaammammut agguaanneqartartut 22.000 koruunnit eqqumiitsuliornikkut suliaqartunut qulinut agguaanneqarput, katillugit qaammatit 18-nut aningaasartuutissatut. Taakkunannga Juaaka Lyberthip atuakkiami “Naleqqusseruttortut” nanginnissaanut tapertippoq. Taassuma saniatigut Dorthe Kjeldsen nunarsuarmik kaajallaanerat tusaamaneqarluartoq pillugu atuakkiussaaq.

Paasisaqarnerorusukkaanni, attavigineqarsinnaavoq: Ilinniartitaanermut, Kultureqarnermut Ilageeqarnermullu Naalakkersuisoqarfimmi, naalakkersuisup allattaa Rosa Thorsen, Toqq/direkte 34 57 02

EQQUMIITSULIORNERMUT KULTURIMULLU ANINGAASALIISSUTINUT QINNUTEQARTUNI SEPTEMBERIMI 2019-IMI ANINGAASALIIFFIGITITTUT