Novemberip 13-ani amerikamiut nunanut allanut ministeriannik Pompeomik ataatsimeeqateqarneq

Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq Ane Lone Bagger danskit nunanut allanut ministeriat Jeppe Kofod peqatigalugu, amerikamiut Nunanut Allanut Ministeriannik Mike Pompeomik pingasunngornermi novemberip 13-anni ataatsimeeqateqassapput. Ataatsimiinnissami Naalakkersuisup peqataaffigisassaani Issittoq Kalaallit Nunaallu oqaluuserineqarnissaat naatsorsuutigineqarpoq.

Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisup tikkuarpaa:

”Nunanut allanut ministerimik Pompeomik ataatsimeeqateqarnissami Naalakkersuisut peqataanissaat pitsaalluinnarpoq. Pingaartumik Issittoq Kalaallit Nunaallu ilaatigut eqqartorniarneqarneranni. Tassunga atatillugu Naalagaaffeqatigiinneq pineqartillugu naligiinnerusumik nukittunerusumillu suleqatigiinnissamut danskit naalakkersuisuisa naalakkersuisuunerminni isumaqatigiissummi neriorsuutertik malittarimmassuk nuannaarutigaarput.”

Ilutigalugulu Ane Lone Baggerip erseqqissarpaa ”Kalaallit Nunaanni suliniutit aningaasaliinerillu Kalaallit Nunaannut kalaallillu innuttaasuinut annertunerpaamik iluaqutaanissaat pingaaruteqartoq.”

Tassunga ilanngullugu naqissuserpaa Pituffimmi kiffartuussinissamut isumaqatigiissut kalaallit sulisartuinut suliffeqarfinnullu iluaqutaanissaa, tamatumalu unammillernartup iluarsiiviginissaanut USA-p Kalaallit Nunaatalu akornanni pitsaasumik suleqatigiinnissamut qularnaatsumik aalajangiisuussaaq.


Annertunerusumik paasisaqarusukkussi:
Naalakkersuisoqarfimmi pisortaq Kenneth Høegh, + 299 56 56 04, kenh@nanoq.gl