Timersornikkut peqqinnissakkullu maligassiuisunik nersorinninnerit

Paarisa, Kalaallit Nunaanni Timersoqatigiit Kattuffiat Elite Sport Greenlandilu pimoorussillutik timersornerup peqqinnissallu iluini suliniuteqartarsimasunik arfininngorpat Katuami Maligassiuisut Showimik taallugu nersorinninniarput. Qilusa Festivalimut naggataarutaasutut, Nuup innuttaanik tamanik sapaatip akunnersua pikialaartitsereerlutik aalatitsereernerminnut naggataarutiginiarpaat.

Maligassiuisut Showertitsinikkut inuit timersornikkut peqqinnissakkullu immikkut suliniuteqarsimasutut maluginiagassat immikkut saqqumilaartikkusullugit, ullorsiorusullugit nersualaarusullugillu, tamatsinnut isumassarsititsisuummata. Ukioq manna tallimassaannik ingerlanneqalerpoq.

Arfininngorneq novemberip ulluisa 16´at nal. 20.00 showertitsinissamut Maren.Louise Poulsen Angajo Lennert-Sandgrenilu tikilluaqqusissapput, KNR´kkut toqqaannartumik aallakaatinneqassalluni. Unnuup ingerlanerani nersornaasisoqallattaassaaq.

Paarisa timigissartarnermik siuarsaasimasunik nersornaasiissamaarami, ukioq manna Atuarfik eqeersimaartoq, Suliffeqarfik eqeersimaartoq kiisalu Innuttaasoq eqeersimaartumik nersornaasiissamaarpoq.

Kalaallit Nunaanni Timersoqatigiit Kattuffiat Faxe Kondi suleqatigalugu ukioq manna Timersullammammik, Sungiusaasutsialammik kiisalu Siulersuillammammik toqqaassapput.

Elite Sport Greenland Grønlandsbankimik SparInvestimillu suleqateqarluni ukioq manna Timersornermi takutitsilluarnerpaaq kiisalu Piukkunnaatilinnik Ineriartortitsisunik nersornaasiissaaq.

Kalaallit Nunanni Timersoqatigiit Kattuffiallu Danske Spilillu aamma ukioq manna Ataatsimooqatigiilluarlutik timersortartunik nersornaasiissapput. Inuit aqqanillit toqqarneqarsinnaapput, Kalaallit Nunanni Timersoqatigiit Kattuffiata Feacebookimi qupperneranut iserlutit ajugaatikkusutarnik taaseqataasinnaavutit novemberip ulluisa 15´ata tungaanut.

Saniatigut nutaaliorluni Kalaallit Nunaanni Timersoqatigiit Kattuffiat Ukioq manna Peqatigiilluarnerpaanik nersornaasiissaartaaq.

Nersornaasiinermi Mike Thomsen, Jim Milne Josef Josefsen allarpassuillu tusarnaartitsissapput. Pisarnertut isiginnaartut qilanaarutissaqarput tupaallannartunik takkuttoqallattaajumaarpoq, taamaattumik Katuamut Maligassiuisut Showeriarniarina taamaanngippat aamma angerlarsimaannarlutit malinnaasinnaavutit KNR´kkut toqqaannartumik aallakaatinneqalerpat novemberip ulluisa 16´at nal. 20.00-21.30

Annertunerusumik paasisaqaqqikkusukkuit uunga attaveqarit:

Paarisa: Peqqissutsimut suliaqarnermut Siunnersorti Kista Hammeken Lennert på tlf. 34 66 12 eller khle@nanoq.gl

GIF/ESG: Pilersaarusiornermut Siunnersorti Christina Tønder Bell på tlf. 34 81 53 imaluunniit  christina@gif.gl