Issittumi uumassusillit assigiinngissitaarnerinik alapernaarsuineq pillugu nunani tamalaani suleqatigiinneq

Ilisimatusartunit aamma issittumi nunani nunat inuiinit aallartitat ulluni makkunani Nuummiipput, Issittumi allannguutit pinngortitami imartanilu avatangiisini takusartakkatik oqallisiginiarlugit. Siunissami uumasooqatigiinnik, pinngortitap pissusianik, uumassusillit assigiinngissitaarnerinik aamma silap allannguutaanik alapernaarsuinermi suleqatigiinneq qanoq ililluta ingerlateqqissaneripput nukittorsassanerippullu ataatsimiinnermi siunnerfigineqarpoq.

 

Sammisaqartitsineq Pinngortitaleriffimmi ingerlanneqarpoq, aammalu Issittumi Siunnersuisooqatigiinnit isumagineqarluni. 2017-imi nunani issittuni ilisimatusartut ataatsimoorlutik ilisimatusarnikkut nalunaarusiaq suliaraat, tassalu State of The Arctic Biodiversity Report, issittumi pinngortitami uumassusillit assigiinngissitaarnerisa allannguutaannut tunngasoq. Nalunaarusiaq ilaatigut siunissami Issittumi uumassusillit assigiinngissitaanerinik alapernaarsuinermi qanoq ililluta suleqatigiissinnaanitsinnut siunnersuutinik imaqarpoq.

 

Sukkasuumik allanngoriartortoqartoq, taamaattumillu alapernaarsuinerup suleqatigiinnerullu nukittorsarneqarnissaat pingaaruteqartoq Issittumi immikkut ittumik ilisimasallit isumaqatigiissutigaat.

 

Uumassusillit assigiinngissitaarnerini allannguutit issittumi inuunermut sunniuteqarput. Uumasunit, Issittumi inuit uumassutigisaannit arlallit pisariuminaallisimapput, immap sikua nungukkiartorpoq, issittumi uumasooqatigiit avannamut nussorput aammalu kujasinnerusumi uumasooqatigiit nunamut takkussuupput. Ilisimatusartunit oqaatigineqartut malillugit issittumi uumassusillit assigiinngissitaarneri pinngortitamilu pissutsit allanngoriarujussuartussaanngorput. Taamaattumik susoqarnissaa pillugu ilisimatusarnikkut siunnersorneqarnissaq, taamaalillunilu Issittumi innuttaasut allannguutinut piareersimanissaat pingaaruteqarpoq.

Allannguutinik alapernaarsuinerup qanoq ililluni ingerlateqqinneqarsinnaaneranut nukittorsarnissaanullu siunnersuutinik saqqummiussisoqarnissaa ataatsimiinnermi siunertaavoq. Tamatuma saniatigut alapernaarsuinerup ilisimatusarnerullu inernerisa Issittumi nunani innuttaasunit pissarsiariuminartuunissaasa qulakkeerneqarnissaa siunnerfigineqarpoq.

Ataatsimiinneq Pinngortitamut Avatangiisinullu Naalakkersuisoqarfiup, Pinngortitaleriffiup aamma Issittumi Siunnersuisoqatigiit ataanni issittumi uumassusillit assigiinngissitaanerinut suleqatigiissitap CAFF-ip (Conservation of Arctic Flora and Fauna) akornanni qanittumik suleqatigiiffiusumik ingerlanneqarpoq.

 

Annertunerusumik paasisaqarusunnermi:

Pinngortitamut Avatangiisinullu Naalakkersuisoqarfimmi pisortaaneq

Mette Skarregaard Pedersen, Tlf.: 529844, E-mail: mesp@nanoq.gl