Atuagaq najoqqutassaq meeqqat kinguaassiutitigut atornerlunneqarsimasut pillugit sulianik ilisimasalinnoortoq

Pitsaaliuinermut Isumaginninnermullu Aqutsisoqarfiup atuagaq najoqqutassaq saqqummersippaa, taannalu sulianik ilisimasallit meeqqat kinguaassiutitigut atornerlunneqartarnerat pillugu pitsaaliuinissamik, paasiniaanermik qanorlu iliuuseqarnissamik suliaqarnissaannut ikiuutaassaaq.

Atuagaq najoqqutassaq sulianik ilisimasalinnut tamanut, ilinniarsimasunut ilinniarsimanngitsunullu, meeqqanik inuusuttunillu sulialinnut saaffiginnittuuvoq. Atuakkamik najoqqutassamik saqqummersitsineq Naalakkersuisut periusissiaannut Killiliisa-mut ilaavoq, periusissiap kinguaassiutitigut atornerluisarnerit ikilisinnissai pitsaasunillu allannguisoqarnissaa anguniagarai.

- Atuagaq najoqqutassaq kinguaassiutitigut atornerluisarnermik akiuiniarnitsinni ataatsimoorussamik ilisimasanik ataatsimoorussamillu oqaatsimik atuisinnaanissatsinnik qulakkeerinneqataassaaq. Ataatsimoorussamik oqaaseqanngikkaanni paatsooqatigiinnissaq qanittuaraavoq. Taamaattumik kinguaassiutitigut atornerluisarneq pillugu akiuiniarnermi suliniutitsinni ilisimasanik siammartiterinissarput, kinguaassiutitigullu atornerluisoqarsimatillugu iliuusissanik periarfissat annertunerusumik ilisimasaqarfigilernissai pingaaruteqarpoq, taama oqarpoq Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen, ullumilu tusagassiortunik katersortitsinermi atuagaq najoqqutassaq saqqummiuppaa.

- Sumiluunniit suligaluaraanni, ilinniagaqarsimasuugaanni ilinniagaqarsimanngitsuugaanniluunniit, tamatta meeqqat kinguaassiutitigut atornerlunneqartarnerannut akiuinissamut tapersiinissamik ataatsimoorussamik akisussaaffeqarpugut. Kinguaassiutitigut atornerluisarnerit nipangiunneqassanngillat. Meeqqagut ajunngitsumik sivisuumillu inuuneqarnissaannut pitsaanerpaanik periarfissaqassapput, meeqqat arlaannaalluunniit nakuuserfigineqassanngilaq innarlerneqarluniluunniit, taama oqarpoq Naalakkersuisoq Martha Abelsen.

Atuagaq najoqqutassaq meeqqat kinguaassiutitigut atornerlunneqarsimasut pillugit ilisimasanik imaqarpoq, sulianillu ilisimasalinnut sammisamik suliaqarnissaannut sakkussanik tigussaasunik tunisisuulluni. Ilaatigut meeqqat kinguaassiutitigut atornerlunneqartarnerat pillugu qanoq pitsaaliornissaanut ikorfartuisoqarsinnaasoq, kinguaassiutitigut atornerluinerit qanoq paasineqarsinnaasut aamma meeraq kinguaassiutitigut atornerlunneqartoq paasigaanni qanoq iliorsinnaasut atuarneqarsinnaapput.

Sapaatit akunneri tulliuttut iluanni nuna tamakkerlugu ulluunerani paaqqinnittarfiisa, atuarfiisa, sunngiffimmi orniguttarfiisa, isumaginninnermik ingerlatsiviisa, ilaqutariit sullissiviisa, ulloq unnuarlu paaqqinnittarfiisa, politiit napparsimmaviisalu atuagaq najoqqutassaq allakkatigut tigussavaat.

Atuagaq najoqqutassaq uani atuarneqarsinnaavoq.

Paasissutissat sukumiinerusut pillugit immikkoortortaqarfimmi pisortaq Ditte Sølbeck attavigineqarsinnaavoq, oqarasuaatikkut +299 34 60 37 imaluunniit mailikkut ditt@nanoq.gl