Namminersorlutik Oqartussanut kommuninullu aningaasaqarnikkut aqutsinermi atortoq nutaaq – ERP-mik suliniut Pisariillisaaneq

Aningaasaqarnikkut aqutsinermi atortumut nutaamut nuunneq Naalakkersuisut kommunillu Kalaallit Nunaanni pisortat ingerlatsinerannik pisariillisaanermi ataatsimut anguniagaanni pingaaruteqartut ilagaat.

Nittartakkami tusagassiorfiup Sermitsiap tallimanngormat ERP-mik suliniut maanna ingerlasumik allaaserinninnera annertunerusumik oqaaseqarfiginissaanik pisariaqalersitsivoq.

ERP-mik suliniut pisortat ataatsimoorussamik aningaasaqarnikkut pisortallu paasissutissiinerannut atortorissaarutaannik ineriartortitsinermik pisinermullu tunngavoq, tassanilu kommunit tallimat Namminersorlutillu Oqartussat taakkulu ataanni suliffeqarfiit tamarmik peqataassapput. Suliniutit pisortat ataatsimut peqatigiiffigisaannit, kommunit Namminersorlutillu Oqartussat naligiimmik peqataaffigisaannik aqunneqarpoq.

ERP-mik suliniut 2012-imi aallartinneqarpoq. Sivisuumik sukumiisumillu piareersaasiortoqareersoq august 2016-imi atortorissaarummik, qallunaat kommuniini amerlasuuni atorneqareersumik, pisiortortumik inaarutaasumik paasiniagassat pereermata ikkussuinissamut isumaqatigiissuteqartoqarpoq.

Januaarimi 2018-imi Kommuneqarfik Sermersooq ERP-mik atortorissaarummik nutaamik atuilerpoq, Namminersorlutillu Oqartussat 2019-imi upernaakkut aallartipput. Maannakkullu Qeqqata Kommunia ikaarsaaleruttorpoq, taamaalillunilu kommuni ullualuit qaangiuppata atortorissaarummik atuilissaaq. Kommunit sinneruttut (Kommune Kujalleq, Avannaata Kommunia Kommuneqarfik Qeqertalillu) 2020-p upernaavani atortorissaarummut nutaamut nuunnissaat naatsorsuutigineqarpoq.

Suliap ingerlanera suliniutip siuariartorneranut tunngatillugu pisariaqanngitsunik taamaassorinninneqarpoq. Suliniut siuariartorluarpoq.

Danmarkimi kommunip naatsorsuutaanik ERP-mut ikkussuineq nalinginnaasumik ukiup ataatsip missaanik sivisussuseqartarpoq. Taannalu uuttuutigigaanni kommunini tallimani, Namminersorlutillu Oqartussani minnerunngitsumillu Akileraartarnermut Aqutsisoqarfimmi ikaarsaarneq ukiut arfinillit arfineq marlulluunniit tikillugit sivisussuseqarsinnaassaaq. Maanna atulersitsinermut ilimagisaasut aallaavigissagaanni pineqartuni ikaarsaarneq 2020-p naanerani naammassineqarsimassaaq, taamaalillunilu sulineq ukiut pingajuat avillugu sivisussuseqarsimassalluni. Tamannalu ajorisassaanngilaq, naak suliap ingerlanerani soorunami aporfinnik siumut takorloorsinnaanngisanik aqqusaagaqartoqartaraluartoq.

Massakkorpiaq Akileraartarnermut Aqutsisoqarfiup atortorissaarummut nutaamut ikaarsaarnissaa suliniummi unammillernartitat annersaraat, ikaarsaarnissarlu arlaleriarluni kinguartinneqarpoq. Tamanna qarasaasiami paasissutissat annertoorujussuit, suliat amerlasoorujussuit, kiisalu paasissutissat pisariusut annertuut atortorissaarummut nutaamut nuunneqartussaanerannik patsiseqarpoq. Kinguartitsinerit ilaat Akileraartarnermut Aqutsisoqarfiup atortorissaarummut nutaamut ikaarsaarnera, Namminersorlutik Oqartussani immikkoortut allat ikaarsaarnerinut sunniuteqannginnissaanik patsiseqarpoq.

Taamaalillunilu qarasaasiami programimik nutaamik allartitsiinnarnissap matumani pineqannginnera paasissallugu pisariaqarpoq – maanna aningaasaqarnermut paasissutissat kommunini tallimani Namminersorlutillu Oqartussani atortorissaarutitoqqani pigineqartut, atortorissaarummut nutaamut ilaasinnaanngorlugit nuutsinneqartussaapput. Taamaaliornerlu iluamik ingerlanneqassappat piffissamik annertuumik atuiffiusarpoq – taamaattoqartussaavorlimi, allamimmi periusissaqartoqanngilaq.

Aningaasaqarnikkut aqutsinermi atortumik nutaamik atulersitsinerup saniatigut, suliniut aamma ataatsimoorussamik nutaamik kontoplanimik ineriartortitsinissamik atulersitsinissamillu imaqarpoq. Tamatumalu nassatarisaanik kommunini Namminersorlutillu Oqartussani siunissami aningaasartuutit isertitallu assigiiaartumik eqqortumillu takutitsisumik nalunaarsorneqartalissapput. Tamatumalu kingorna pisortat Kalaallit Nunarput tamakkerlugu aningaasartuutaasa sumut atorneqarsimanerat erseqqinnerujussuarmik nalunaarsorneqarsinnaalissaaq. Taamattaaq kommunit akimorlugit atuinerit eqqornerusumik imminnut sanilliunneqarsinnaalissapput, taamaaliornikkullu innuttaasunut politikerinullu iluaqutaasumik aalajangernissanut pitsaanerusunik toqqammavissanik pilersitsisoqarsinnaalissaaq. Tamanna naggataagut kikkunnut tamanut iluaqutaasumik naatsorsoqqissaakkanik pitsaanerusunik peqalernermik, taamatullu aamma pisariitsumik aningaasaqarnermik aqutsinermik qulakkeerinninnissamut pitsaanerusumik toqqammavissiissaaq.

ERP-mik suliniut, suliniutit arlallit pisortat isumalluutinik atuinerisa pitsaassusaanik qaffassaanissamik siunertaqartut ilagaat. Akiliisarfik Ilanngaassivik aamma tassunga atatillugu taaneqarsinnaavoq.
Tamakku tamarmik pisortani ingerlatsinerup pisariinnerulerlunilu aqulluarneqarnerunerannut peqataaqataassapput. Tamannalu tamatta soqutigisariaqarparput.

Inussiarnersumik inuulluaqqusillunga
Vittus Qujaukitsoq

Annertunerusumik paasisaqarusunnermi attavigineqarsinnaavoq ERP allattoqarfiani pisortaq Ivan Damborg,  Oq./Tel.: +299 49 11 21 og ivda@nanoq.gl