Kinguaassiutitigut atornerlunneqarsimanerup kingorna inuuneq pillugu Killiliisamut atatillugu filmi piviusulersaarut

Filmi piviusulersaarut ”Pilluarneq Ersigiunnaarpara” inuit marluk kinguaassiutitigut atornerlugaasimanerat pillugu, aamma meeraanerminni kingunerlutsitsisimasunik misigisaqartarsimagaluarlutik ajunngitsumik toqqissisimasumillu inuuneqalersimanerannik oqaluttuaapput marluk sakkortuut.

 

Filmi piviusulersaarut Naalakkersuisut kinguaassiutitigut atornerluineq akiorniarlugu periusissiaata Killiliiisap ilagaa, tassani anguniagaavoq pitsaasumik allannguuteqartoqassasoq, Kalaallillu Nunaanni kinguaassiutitigut atornerluinerit annikillissasut. 

 

- Kinguaassiutitigut atornerluinerit akuerineqarsinnaanngillat aamma kinguaassiutitigut atornerluinerit nipangiutiinnarneqartassanngillat. Kinguaassiutitigut atornerluinerit akiornerat uagut inuiaqatigiittut ataatsimut suliarisariaqarparput. Taamaattumik kinguaassiutitigut atornerluineq pillugu ataatsimut ilisimasanik ataatsimullu oqaatsinik ineriartortitsisariaqarpugut, Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen oqarpoq.

 

”Pilluarneq Ersigiunnaarpara” tassaavoq inuit marluk, meeraallutik kinguaassiutitigut atornerlunneqarsimasut pillugit filmi piviusulersaarut. Gukki Nuka (53-inik ukiulik) eqqumiitsuliortuuvoq, maannalu meeraalluni illoqarfigisimasaminut Uummannamut, tassani kinguaassiutitigut atornerlunneqarfigisimasaminut uteqqissaaq. Kornelia (24-nik ukiulik) ulloq manna tikillugu suli annilaangajuartoq, kisianni ajortut naaffeqanngitsut kipisimavai maannalu meeraalluni kissaatigisimasamisut kiffaanngissuseqarluni inuuneqarusunnini sorsuutigalugu. 

 

- Gukki Nukap aamma Korneliap sassarnissartik, inuttullu namminneq oqaluttuassartaminnik uatsinnut avitseqateqarnissartik toqqarsimammassuk, taamaalilluta tarrarsorfigisinnaasatsinnik tunineqarpugut. Inuulluni kinguaassiutitigut atornerlugaasimalluni qanoq inummut isumaqarnersoq pillugu ilisimasanik pingaarutilinnik ataatsimoortunillu pissarsiaqarpugut. Peqatigitillugu oqaluttuat neriuuteqalersippaatigut, tassami Gukki Nukap aamma Korneliap taama misigisaqartarsimagaluarlutik qanoq namminneq ajunngitsumik toqqissisimasumillu  inuuneqalernissartik anguniarlugu qanoq iliuuseqartarnerlutik takutippaatigut,  Naalakkersuisoq Martha Abelsen oqarpoq.

 

Namminersorlutik Oqartussat kinguaassiutitigut atornerlunneqarsimallutik kingunerlutsitsisunik katsorsaallutik angalaqatigiittartut tarnip pissusiinik ilisimasallit apersorneqarnerisigut Gukki Nukap aamma Korneliap pissutsit atugaasa aamma sorsunnerisa ataqatigiinneri paasissutissiissutigineqarput, matumani kinguaassiutitigut atornerlunneqarneq pillugu sammisaq paasiuminarsarneqarluni tigussaasunngortinneqarlunilu.  

 

 ”Pilluarneq Ersigiunnaarpara” filmiugaluarluni oqimaatsunik imalik inuunermut kajumissinartuuvoq, tassani Gukki Nuka Kornelialu meeraanerminni kingunerlutsitsisunik misigisaqarsimagaluarlutik ajunngitsumik toqqissisimanartumillu inuuneqalersimanerminnik toqqaasimanerminnik takutitsiffigaatigut.

 

Filimi piviusulersaarut Pitsaaliuinermut Isumaginninnermullu Aqutsisoqarfik sinnerlugu Nivaara Filmsimit suliarineqarpoq. Filmi illoqarfinni arlalinni takutinneqassaaq, kingornalu oqallitsitsisoqartassaaq. Billetsit akeqanngillat kikkullu tamarmik soqutiginnittut tikilluaqqusaapput. Filmi meeqqanut 15-it inorlugit ukiulinnut naleqqutsinngilaq, aamma meeqqat 18-it inorlugit ukiullit inersimasumik ilaqartinneqarnissaat inassutigineqarpoq.

 

Filmi illoqarfinni ukunani takutinneqassaaq.

 

Nuuk: 7. november Nal. 18:00 – 20:30, Katuaq

Ilulissat: 10. november Nal. 19:00 – 21:00, Sermermiut Kulturip Illorsua

Aasiaat: 13. november  Nal. 19:00 – 21:00, Katersortarfik

Maniitsoq: 17. november Nal. 19:00 – 21:00, Katersortarfik

Narsaq: 21. november Nal. 19:00 – 21:00, Katersortarfik

Tasiilaq: 25. november Nal. 19:00 – 21:00, Katersortarfik

 

 

Paasisaqarnerorusukkuit attavigiuk Immikkoortortaqarfimmi pisortaq Ditte Sølbeck oqarasuaatikkut +299 34 60 37 imaluunnit e-mailikkut ditt@nanoq.gl