Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq Ane Lone Baggerip oqalugiaataa

Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq Ane Lone Baggerip Nunani Avannarlerni Nunanut Allanut naalakkersuisut pingasunngornermi 30/10 -19 Stockholmimi nalunaaruteqarneranni oqalugiaataa.

Asasakka Siulittaasoqarfik, asasakka suleqatit,

Nunatsinnut annertuumik pingaaruteqartumik ukiuni qaangiuttumi pisoqarfiuvoq nikerartoqarlunilu.

Ukiuni makkunani nunat pissaanilissuit sakkutooqarneq ilanngullugu Issittumut soqutiginninnerat malunnaateqarluarpoq. Pissutsit piviusut ukiuni qulikkaani kingullerni takusimanngisavut ullumikkut atuupput, taamaattorli pisut nunatut naalagaaffeqatigiittullu eqqumaffigalugit iliuuseqarfigisariaqakkavut.

Amerikap tungaanit Kalaallit Nunaata suleqatiginissaanut annertusiartortumik soqutiginnittoqarpoq – suliallu tamaasa kalaallit nunaaanni innuttaasunut iluaqutigitinniarnissaat Naalakkersuisunit sulissutigineqarpoq. Amerikamiut Kalaallit Nunaanni aallartitaqarfimmik ammaaniarnerat pisortatigoortumillu attaveqaatit tunngavigalugit pitsaasumik oqaloqatigineqarnerat Naalakkersuisunit qularinngilarput.

Soorlu oqaatigineqareersoq, nunarput tuniniagaanngilaq, taamaattorli suleqatigiinnissamut niueqatigiinnissamullu ammavugut.

Taamaattorli nunatsinni sakkutooqarfeqarnerat kalaallinut iluaqutissiinissaa kissaatigaarput, tamannalu Danmarkimik USA-millu oqaloqatiginnittarnerni pingaartinneqarluni oqariartuutigineqartarpoq.

Islandimik qaninnerusumik suleqateqarneq Reykjavikimi sinniisoqarfeqalernikkut nukittorsarneqarpoq. Sinniisoqarfitta politikkikkut, kulturikkut niueqatigiinnikkullu Islandimik attaveqaqatigiinnitta ineriartortillugulu nukittorsarneranut tapertaavoq.

Atortulersuutitigut , tassani silaannakkut imaatigullu assartuineq kisiisa pinnagit aamma takornariaqarnikkut, sanaartornikkut aalisarnikkullu suleqatigiinnerup nukittorsarnissaat Naalakkersuisunit naatsorsuutigaarput.

Inuiattut ineriartornitsinni oqaluuserisassat nammineerluta pilersissavagut. Nammineerluta nunarsuarmioqatigiinnit politikkerput pingaartitagullu suunersut ilisimaneqarnissaat qulakkiigassaraarput. Nunarsuarmioqatigiillu nunatsinnik soqutiginninnerisa nunatta innuttaanut iluaqutaanissaat qulakkiigassaraarput.

Qujanaq.