Timmissat pillugit nalunaarut nutaaq Naalakkersuisunit akuerineqartoq

Timmissat pillugit nalunaarut nutaaq 17. oktobari 2019-imi Naalakkersuisunit akuersissutigineqarpoq.

Timmissat pillugit nalunaarummik nutaaliornermi naajanik tulukkanillu ajornartorsiuteqarnerup annikillisinneqarnissaa siunertarineqarpoq, tamatumani 2017-imi Inatsisartut aalajangiinerat tunngavigalugu ukiuni tallimani killilersugaanngitsumik piniarneqarsinnaalersinneqarput. Allannguutit pingaarnerit tullinnguuttut makkuupput:
  • Tulukkat (Corvus corax), naajarujussuit (Larus hyperboreus) aamma naajarluit (Larus marinus) nalunaarutip matuma atuutilerneraniit ukiuni tallimani misileraaffiusuni, piniarfioreersup saniatigut, inunnit inuussutissarsiutigalugu piniarnermut aamma sunngiffimmi piniarnermut atuuttumik allagartalinnit ukioq kaajallallugu piniarneqarsinnaalissapput.
  • Mittarfeqarfinni kommuninilu akuersissuteqaqqaaratik tulukkat naajallu manniinik mannissarniarsinnaallutillu uuliarterisinnaapput.
  • Sumiiffiit piniarfioqqussanngitsut tallimanik ilaneqarput: Kingittoq (Upernaviup Kujalliup eqqaaniittoq); Taateraarunnerit (Paamiut eqqaaniittoq); Kitsissut Avalliit (Qaqortup eqqaaniittoq); Kangikajik (Ittoqqortoormiit) aamma Appalik (Ittoqqortoormiit).
Timmissat pillugit nalunaarut nutaaq 1. novembari 2019-imi atuutilissaaq ukiunilu tallimani misileraasoqareerpat suliniut ataavartunngortinneqassanersoq nalilersuiffigineqassaaq.

Paasissutissat erseqqarinnerusut pillugit immikkoortortaqarfimmi pisortaagallartoq, Nuka Møller Lund, Aalisarnermut, Piniarnermut Nunalerinermullu Naalakkersuisoqarfik, oqarasuaat: 34 53 45, e-mail: numl@nanoq.gl, attaveqarfigiuk.