Eqqunngilaq 78 million koruuninik annaasaqartoqassammat

KNR.gl oktobarip 31-anni 2019-imi ilanngutassiamini qulequtsiilluni ima allappoq ”Pisassiiffiunngitsuni 78 millionit aalisarneqartut”, Upernavimmi, Uummannami Qeqertarsuullu Tunuani aalisartut pisassiiffiunngitsuni aalisarunnaarpata aningaasat katillugit 78 million koruunit annaassaagaat. Radioaviisip ullumi oktobarip 31-anni ilanngutassiaa innersuussutigalugu taama allappoq.

Ilanngutassiat saqqummiunneqartut eqqunngillat, oqaatigineqartormi paatsuuinermik tunngaveqarpoq, pisassiiffiunngitsut aamma aqutsiveqarfinni Upernavimmi, Uummannami aamma Qeqertarsuup Tunuani TAC-it pillugit paatsuuinerminik tunngaveqarluni oqaatiginnittoqarmat.

Ilumoorpoq oqaatigineqarmat aqutsiveqarfinni pineqartuni pingasuni 2018-imi pisassiissutaanngitsunik katillugit 4.325 tonsinik aalisartoqarmat.
Pisassiissutinik atorunnaarsitsisoqarpat qalerallit taama amerlatigisut aalisarunnaarnissaannik isumaqanngilaq. 4.325 tonsit amerlanersaat aqutsiveqarfik Upernavimmi aalisarneqarput, 2.829 tonsit Upernaviup eqqaani pisassiiffiunngitsumi 2018-imi aalisarneqarlutik. Aqutsiveqarfimmi Upernavimmi 2018-imut qaleralittassiissutigineqartorpassuarnit 4.780 tonsit aalisarneqaratik.

Aalisarneqanngitsut tassaapput umiatsiaararsortunut qaleralittassiissutigineqartut 1.937 tonsit aalisariutinullu pisassiissutigineqartut 2.843 tonsit.

2018-imi pisassiiffiunngitsuni aalisartarfeqarsimasuunngippat 4.325 tonsit ilarujussui pisassiissutinut ilanngullugit aalisarneqarsimassagaluarput, taamaalilluni aalisanngitsuukkat ikinnerujussuussagaluarlutik.
KNR.gl-ip ullumi allaaserisaani aamma radioaviisimi oqaatigineqanngilaq Upernaviup eqqaani pisassaaffiunngitsoq, tassaasussaasoq, qaleralinniarneq pillugu nalunaarutissatut siunnersuummi, Upernavimmi TAC-mut ilaliunneqassasoq.

Erseqqissaassutigineqassaaq Upernaviup, Uummannap aamma Qeqertarsuup tunuani maannakkut pisassiiffiunngitsuni aalisartarneq allanngortinniarneqarmat, siunnersuummi kissaataalluni pisassiiffiuneq ajortut pisassalerlugit pineqartalernissaat.

Pisassiffiunngitsut atorunnaarsinneqarpata Naalakkersuisut aqutsiveqarfinnut ukiut tamaasa tamakkiisumik pisassiisalissapput, maannakkut TAC-mik aalajangersaasoqartarpoq, pisassiiffiunngitsut killeqanngitsumik ilanngunneqartarlutik.

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi pisortaaneq, Jørgen Isak Olsen. E-mail: jio@nanoq.gl