Nunat Avannarliit Killiit Siunnersuisoqatigiivisa meeqqanut inuusuttunullu atuakkiornermi nersornaasiuttagaanut malittarisassat nutaat atsiorneqarput

Nunat Avannarliit Killiit Siunnersuisoqatigiivisa præsidentia Guðjón S. Brjánsson aamma nunat avannarliit killiini kultureqarnermut naalakkersuisut Jenis av Rana, Ane Lone Bagger og Lilja Dögg Alfreðsdóttir oktobarip 29-ani 2019 Stockholmimi Nunat Avannarliit Killiit Siunnersuisoqatigiivisa meeqqanut inuusuttunullu atuakkiornermi nersornaasiuttagaanut malittarisassat nutaat atsiorpaat.

1999-mi Nunat Avannarliit Killiit Siunnersuisoqatigiivisa ukiumoortumik ataatsimiinnerminni pilersippaat Nunat Avannarliit Killiit Siunnersuisoqatigiivisa meeqqanut inuusuttunullu atuakkiornermi nersornaasiuttagaat, siullerpaamillu 2002-mi tunniunneqarpoq. Ukioq ataaseq allortarlugu nersornaasiisoqartarpoq, meeqqanut inuusuttunullu atuakkianut nunat avannarliit killiit oqaasii pingasuusut arlaat atorlugit atuakkiarineqartumut tunniunneqartarpoq.

Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq Ane Lone Bagger oqarpoq: “Nuannaarutigaara Nunat Avannarliit Killiineersut suleqatikka Nunat Avannarliit Killiit Siunnersuisoqatigiivisalu præsidentiat Nunat Avannarliit Siunnersuisoqatigiivisa ukiumoortumik Stockholmimi ataatsimiinneranut atatillugu naapissinnaagakkit, nersornaammullu malittarisassat nutaat atsiorlugit aammalu nunat avannarliit killiit oqaasiisa siunissaat oqaluuseralutigu, tamanna Nunat Avannarliit Killiit Siunnersuisoqatigiivisa ukiumi 2019-2020-mut sammisarivaat".



Paasissutissanik perusukkuit saaffigissavat allatsi Rosa Thorsen
E-mail: rosath@nanoq.gl
Oq. 55 33 03