Qeqqussat avammut nioqquteqarluni inuussutissarsiorfiusinnaanera pillugu workshoppi

Qeqqussat tassaapput nerisassiassat peqqinnartut, eqqortumik suliaralugillu nerisassiarineranni assissaqanngitsumik mamassusillit. Taamaattumik nunatsinnit avammut nioqqutigisani qeqqussat piukkunnaateqarluarsinnaapput. Tassavoq ulloq 28. oktobari 2019-imi Inuussutissarsiornermut, Nukissiuuteqarnermut Ilisimatusarnermullu Naalakkersuisup ingerlassaani qeqqussat pillugit workshoppimi inerniliussat ilaat. Peqataasut assigiinngitsorpassuarnik tunngaveqartuusunit workshoppimi peqataapput, peqataasullu 30-t sinneqarlutik. Tassaapput kommunalbestyrelsinit, namminersorlutik oqartussanit, suliffinnit mikinerusunit anginerusunillu, soqutigisaqaqatigiittut kattuffinnit, inuussutissarsiorfinnik siuarsaanissamik ingerlatseqatigiiffinnit sinniisut, aallarniisut, ilinniartut, ilisimatusartut, neriniartarfeqarfiit allallu qeqqussanik soqutigisaqartut.

Qeqqussanik tunisassiornermik siusinnerusukkut aamma maannakkut suliaqarfiusutut suliniutit pillugit workshoppimi eqqartuisoqarpoq. Qeqqussat ilusaasa assigiinngitsorpassuuneri ersarissipput, taakkulu periutsit assigiinngitsorpassuit atorlugit suliarineqarsinnaallutik. Taamaattumik qeqqussanik soqutigisaqaqatigiit katersornissaasa pingaaruteqarnera workshoppip takutippaa, taamaalillutik imminni isumassarsiarpassuaminnik paarlaateqatigiissinnaassammata. Oqaloqatigiinneq ilisimasanillu paarlaasseqatigiinneq pitsaasoq tamanna qeqqussanik suliniutinik nutaanik aallartisaanissamut imaluunniit ineriartortitaqarnissamut tunngavissiisinnaavoq. Isummersuutit siunnersuutillu, peqataasunit tunniunneqartut, qeqqussanut ineriartortitsinermut suliaqarnermi atorneqassapput.

Inuussutissarsiornermut, Nukissiuuteqarnermut Ilisimatusarnermullu Naalakkersuisoq Jess Svane oqarpoq:
Qeqqussat avammut nioqqutaasinnaaneranik workshoppip takutippaa. Piukkunnaataasoq tamanna peqatigiilluta kivissavarput. Taamaattumik sammisamik pingaarutilimmik tassannga workshoppimi peqataasut 30-t sinnersimanerat uannut assut nuannaarutaasimavoq. Inassutigineqartut amerlasuut ajunngivissullu, peqataasunit tunniunneqartut, misissuataassavagut qeqqussanullu suliaqarnermi ineriartortitsinermut atorneqassallutik.

Isumasioqatigiinnermi pingaarnertut ilassutigineqartoq tassaavoq, qanilaartumik pitsaasumillu suleqatigiinnissaq, qeqqussanut tunngatillugu ineriartortitsisoqassappat. Taamaattumik isumasioqatigiinnermi peqataasunit tunniunneqartut inassutigineqartullu, soqutigisaqaqatigiit qeqqussanik suliaqartut peqatigalugit ingerlanneqassapput.


Annertunermik paasissutissarsioruit attavigiuk:

Inuussutissarsiornermut, Nukissiuuteqarnermut Ilisimatusarnermullu Naalakkersuisoqarfik, oq. +299 345000, e-mail: isiin@nanoq.gl