Amerikamiut nunanut allanut ministeriata siunnersortaata Kalaallit Nunaat Danmarkilu tikeraarpai

Amerikamiut nunanut allanut ministeriata siunnersortaa, T. Ulrich Brechbuhlip Kalaallit Nunaat Danmarkilu paasissarsiorluni tikeraarpai.

Siunnersortip Brechbuhlip Illersornissamut ministeri Trine Bramsen kiisalu atorfilittat Statsministereqarfimmeersut Nunanullu allanut ministereqarfimmeersut Danmarkimi ataatsimeeqatigai. Nunanut Allanut Naalakkersuisoqarfik aammattaaq Københavnimi ataatsimiinnerni makkunani peqataavoq.

Siunnersortip Brechbuhlip Naalakkersuisut Siulittaasuat, Aningaasaqarnermut Naalakkersuisoq, Aatsitassanut Suliffeqarnermullu Naalakkersuisoq, Inuussutissarsiornermut, Nukissiuuteqarnermut Ilisimatusarnermullu Naalakkersuisoq, kiisalu Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq Kalaallit Nunaanni ataatsimeeqatigai.

Siunnersortip Brechbuhlip Kunngeqarfimmut ambassadøri, Carla Sands, kiisalu Amerikamiut nunanut allanut ministereqarfianniit, illersornissamut ministereqarfianniit aamma Amerikamiut nunaminni namminermi isumannaallisaanermik siunnersuisoqatigisaanniit atorfilittat ilagivai. Nuummi ataatsimiinnerni danskit nunanut allanut ministereqarfiat aamma peqataavoq.

Siunnersorti Brechbuhl paasisassarsiorluni tikeraarmat Naalakkersuisut aallartitallu akornanni ataatsimiittoqaannarpoq, ataatsimiinnernilu Kalaallit Nunaat kiisalu aningaasaliinissamut, suleqatigiinnissamut niuernermullu periarfissat pillugit saqqummiisoqarpoq. Taamaattumik USA-mik suleqateqarnissaq pillugu aalajangiisunik isumaqatigiissuteqartoqanngilaq.

”USA iligisatsitut qaninnersaraarput, oqaloqatigiilluarpugullu. Siunnersortimut Brechbuhlimut aallartitaanullu paasisassarsiorlutik angalaneruvoq, tassanilu Kalaallit Nunaanni ineriartorneq pillugu oqaluttuassalluta periarfissinneqarpugut. Siunnersorti Brechbuhl paasisaqangaarsimalluni angerlassasoq qanorlu ililluni Kalaallit Nunaata, Danmarkip USA-llu akornanni suleqatigiinnerup nukittorsarsinnaaneranut isumassarsianik tigussaasunik pilersitsissasoq qularutiginngilara.” - Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq oqarpoq.

Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq nangippoq: ”Amerikamiut aqutsisoqarfianniit ukioq manna arlaleriarluta tikeraartoqarpugut, pingaartumik ambassadøri Carla Sands tikeraakulavoq. Ukioq manna Amerikamiut tungaanniit nunatsinnut soqutiginninneq annertusiartortoq takuarput, uatsinnillu suleqateqarnissaminnut piumassuseq takutippaat. Ineriartorneq tamanna nutaaq iluaraarput, Amerikamiullu soqutiginninnerat takussaasunik kinguneqartinneqarnissaanut takusaqarnissatsinnut qilanaarpugut. Naalakkersuisut Amerikamiut ataatsimeeqatigigaangamikkit, sutigut tamatigut, Amerikamiut Pituffimmi sakkutooqarfeqarnerat Kalaallit Nunaannut takussaasunik iluaqutissaqarnissaa pingaaruteqartoq erseqqissartarparput, pingaartumik tassunga ilanngullugu kiffartuussinissamik isumaqatigiissut. Tamanna siunnersortimut Brechbuhlimut aallartitaanullu oqaatigeqqissimavarput.”

Annertunerusumik paasisaqarusunnermi saaffigineqarsinnaavoq Nunanut Allanut Naalakkersuisoqarfimmi pisortaq Kenneth Høegh, oqarasuaat +299 56 56 04, mail: kenh@nanoq.gl