Immiaaqqanik aalakoornartortaqanngitsunik eqqussisoqarsinnaalerpoq tuniniaasoqarsinnaalerlunilu

Naalakkersuisut sisamanngormat 24. oktober 2019-imi immiaaqqanut imeruersaatinullu kulsyrinik akulinnut nalunaarut nutaaq, arfininngornermiit ulloq 26. Oktober 2019-miit pisiniarfiit inuussutissarsiutinillu ingerlataqartut immiaaqqanik aalakoornartortaqanngitsunik ataasiaannarluni atugassanik puulinnik tikisitsisinnaalernissaannut periarfissiiffiusoq akueraat.

Maannamut immiaaqqanik aalakoornartortaqanngitsunik pisinissaq tunisinissarlu ajornarsimavoq, tunisassiat poortuutaat Kalaallit Nunaanni puiaasanik utertitsisarnermut ilaanngimmata. 2019-imi maajimi Inatsisartut upernaakkut ataatsimiinneranni immiaaqqat aalakoornartortaqanngitsut poortuutinut nalunaarummut ilaatinneqannginnissaat, taamaalillunilu immiaaqqat aalakoornartortaqanngitsut ataasiaannarluni atugassanik puullit tuniniarneqarsinnaalernissaat akuersissutigineqarpoq.

Siusinnerusukkut immiaaqqanik aalakoornartortaqanngitsunik poortuutinut akuerisanut maqitsisoqartarsimavoq, kisiannili immiaaqqanik aalakoornartortaqanngitsunik eqqussisarneq poortuutinullu akuerisanut maqitsisarneq imminut akilersinnaanngitsoq paasinarsisimavoq. Taamaattumik siusinnerusukkut atuisut immiaaqqanik aalakoornartortaqanngitsunik pisinissaat ajornarsimavoq.

Inatsit malillugu immiaaqqat aalakoornartortaqanngitsut, aalakoornartumik 0,5 %-it tikillugit akullit, immiaaqqat nalinginnaasut saniatigut imigassartornermi kingunerluutaasinnaasunik pinngitsuuerusuttunut qinigassaapput.

Nalunaarut nutaaq nassaarineqarsinnaavoq uani aamma www.lovgivning.gl alakkarlugu.

Annertunerusumik paasisaqarusuttunut attaveqarfissaq:
Pinngortitamut Avatangiisinullu Naalakkersuisoqarfimmi pisortaaneq
Mette Skarregaard Pedersen Tlf.: 529844 E-mail: mesp@nanoq.gl