Aatsitassat pillugit naapeqatigiinneq

Ulloq 23. oktobari 2019-imi Aatsitassanut Suliffeqarnermullu Naalakkersuisup Erik Jensenip USA-mit aallartitat ataatsimeeqatigai, tassaasut Kunngeqarfimmut Danmarkimut Amerikap ambassadøria Carla Sands, Departement of State Counselor T. Ulrich Brechbuhl, Department of State Assistant Secretary for Energy Resources Frank Fannon, kiisalu Departement of Statemi, National Security Councilimi, Departement of Defensemit sinniisuutitat allat.

Ataatsimiinnermi Aatsitassanut Suliffeqarnermullu Naalakkersuisoqarfik Kalaallit Nunaanni aatsitassanik suliassaqarfimmut tunngasunik saqqummiussaqarpoq, aammalu USA-mut pingaaruteqartunik Kalaallit Nunaanni aatsitassaqarneranik, aatsitassanillu pilersuisinnaanermut ilimanaateqarneranik ilisimatitsilluni. Kalaallit Nunaanni aatsitassanik suliassaqarfiup ineriartortinnissaanut periarfissat, USA-p aamma Kalaallit Nunaata akornanni aatsitassanik suliassaqarfimmi siunissami suleqatigiissinnaaneq ilaliullugu oqaluuserineqarput.

Aatsitassanut Suliffeqarnermullu Naalakkersuisoq Erik Jensen: ”USA-lu ilusilersukkatut suleqatigiinneq ammasumillu oqaloqateqarneq pingaartippakka, aamma aatsitassanik suliassaqarfiup ineriartortitaanera aqqutigalugu Kalaallit Nunaannik aamma USA-mik iluaquteqartitsisinnaasutut aatsitassanik suliassaqarfimmi piviusunik suliarisatigut attaveqarfiusup ineriartortitaanissaa qilanaaraara.”

Annertunerusumik paasisaqarusunnermi saaffigineqarsinnaavoq Jørgen T. Hammeken-Holm, pisortaaneq Aatsitassanut Suliffeqarnermullu Naalakkersusioqarfik. Mail: joeh@nanoq.gl Oqaras: +299 346846