Nunat Avannarliit Killiit ministerii Nuummi ataatsimiipput

Nunat Avannarliit Killiit Siunnersuisoqatigiivini nunat avannarliit killiit ministeriisa akornanni ukiumoortumik ataatsimiinneq ukioq manna Nuummi oktoberip 22-ani 2019 ingerlanneqarpoq. Tassani Islandimit, Savalimmiunit Kalaallit Nunaanniillu sinniisut katersuupput ukioq manna qulequtarineqartpq eqqartorlugu: Nunat Avannarliit Killiit imarlu.

Nunat Avannarliit Killiit Siunnersuisoqatigiivi nunanit avannarlernit killernit Islandimit, Savalimmiunit Kalaallit Nunaannillu pilersinneqarpoq, nunat avannarliit killiit soqutigisaat pillugit sulinermi suleqatigiinnissaq siunertaralugu. Siunnersuisoqatigiit inatsisartunit nunanit taakkunannga pingasuusunit ilaasortaqarput, ukiullu tamaasa ukiumoortumik nikittaallutik ukiumut ataatsimiinnermik ingerlatsisarput. Ukioq manna Kalaallit Nunaat tikeraartitsisussatut tulliuvoq.

Naalakkersuisut sinnerlugit Ilinniartitaanermut, Ilageeqarnermut, Kultureqarnermut Nunanullu allanut Naalakkersuisoq Ane Lone Bagger peqataavoq. Islandimit peqataavoq Islandip Aalisarnermut Nunalerinermullu Ministeria Kristján Þór Júlíusson, islandimiut nunanut allanut ministeriat Guðlaugur Þór Þórðarson sinnerlugu peqataasoq.

Ukiumoortumik ataatsimiinnermi Naalakkersuisoq, Ane Lone Bagger Islandimiullu ministeriat, Kristján Þór Júlíusson, Islandip Aalisarnermut Nunalerinermullu Ministeriat ukiumoortumik ataatsimiinnermi qulequtarineqartoq “Nunat Avannarliit Killiit imarlu” pillugit oqalugiarnissamut aggersarneqarsimapput.

Naalakkersuisup, Ane Lone Baggerip oqalugiarnermini erseqqissarpaa nunat avannarliit killiit suleqatigiissutigisinnaasaminnik nutaanik ujaasinissaq pingaaruteqartoq. Tassani ataatsimoorlutik plastikkinik mingutsitsineq piniutillu annaasat maangaannartinneqartartut annikillisarnissaanut nukittunerusumik slinissaq anguniarlugu.

Naalakkersuisup tikkuarpaa nunat avannarliit killiit Kalaallit Nunaannitullu piniutinik annaasanik annaasaqartarnerup annertuumik ajornartorsiutigigaat. Taassuma saniatigut piniutit arriitsuararsuarmik arrortikkiartorneqartarput, naggataatigullu plastikkitut tappiorannartutut siammartertarput imaani avatangiisinut uumassuseqarnermullu mingutsitsisuullutik.

Taamaattumik Naalakkersuisup ersarissarpaa, ”Nunat Avannarliit Killiit suleqatigiinnerisigut annertunerusumik paasisimasaqalersissavaatigut, tassuunalu unammilligassanut tamatsinnut attuisuusunut ataatsimut aaqqiissutissanik nassaarniaqatigiisissinnaalluta”. Ane Lone Bagger oqalugiaammini naggasiivoq; ”Suleqatigiinneq oqaloqatigiinnerlu pingaaruteqarput. Nuannaarutigaara Nunat Avannarliit Killiit ukiumoortumik ataatsimiinneranni tikeraartitsisuusinnaagatta, tassuunalu Islandimit Savalimmiunit Kalaallit Nunaanniillu inatsisiliortunik naapitsinissamut periarfissaqartinneqarluta. Aamma Islandip aalisarnermut ministeriannik naapitsinera naammagisimaarluarpara, tassuuna nunanut pingasuusunut inuiaqatigiinnut qulequttat tunngasut oqaloqatigiissutiginissaannut periarfissinneqaratta.”

Annertunerusunik paasisaqarnerorusukkuit attavigiuk Upaluk Poppel, Nunanut Allanut Naalakkersuisoqarfimmit, upap@nanoq.gl imaluunnit Naalakkersuisup allattaa Rosa Thorsen, rosath@nanoq.gl