Nunanut allanut- sillimaniarnermullu politikkimi suleqatigiinnerup nukittorsarnissaa sulissutigaat

Nunanut allanut ministeri Jeppe Kofod aamma Ilinniartitaanermut, Kultureqarnermut, Ilageeqarnermut Nunanullu allanut Naalakkersuisoq Ane Lone Bagger nunanut allanut- sillimaniarnermullu politikkimi suleqatigiinnerut nukittorsarnissaanut oqaloqatigiinnermi pingaarutilimmik alloriaateqarput

Kofodip Nuummut tikeraarnerani nunanut allanut ministerip Naalakkersuisullu naalagaaffeqatigiinnerup iluani nunanut allanut- sillimaniarnermullu politikkikkut suleqatigiinnerup qanoq nukittorsarsinnaanera oqaluuseraat. Taakku saniatigut suliassaqarfiit arlallit Kalaallit Nunaata Danmarkillu qanimut suleqatigiissutigisaat, EU-mik suleqatigiinnissamut isumaqatigiissut aammalu Kunngeqarfiup issittumut periusissiaa eqqartorpaat. Kunngeqarfiup maanna issittumut periusissiaa 2020-mi naassaaq, nutaamillu suliaqartoqassalluni.

 

Atsaat taama Kalaallit Nunaat Issittorlu nunanit pissaanilinnit ukkatarineqarnerat annertuvoq. Ataatsimiinnermi Ilulissani isumaqatigiissutip pingaaruteqarnera isumaqatigiissutigineqarpoq, tassanilu Issittup eqqissisimaffiunissaata attannissaa pingaartillugu.

 

Jeppe Kofod ima oqaaseqarpoq:

 

”Ullumi pitsaasumik ingerlasumi oqaloqatigeeqqaarnermi danskit naalakkersuisuisa anguniagaat eqqartorneqarput tassaasut qanoq illilluni Naalagaaffeqatigiinni naligiimmik, pitsaasumik suleqatigiinnerullu nukittorsarnissaanik piviusunngortitsinissaq qulakkeerneqassanersoq.  Nukittuumik ataatsimoorussaqarneq illugiinnik ammaffigeqatigiinnermik ataqqeqatigiinnermillu pilersitsisarpoq. Tamanna eqqarsaatinniittorujussuuvoq, tassami nunanut allanut sullissineq Naalagaaffeqatigiinnut tamanut atuuttuuvoq. Kalaallit savalimmiullu nunanut allanut pingaarnersiugaat nunanut allanut sullissivimmi annertuumik ilisimasaqarfiginissaat qulakkeertariaqarpaput. Piffissami qaninnerpaami isumassarsiat suliniutinut aalajangersimasunut ullumikkut eqqartukkavut qanoq piviusunngortinneqarsinnaanersut qimerluuataassavagut. Savalimmiuni suleqatiga Jenis av Rana tamatuminnga aamma eqqartueqatiginissaa qilanaareqaara, qanittumi Tórshavnimut tikeraarnissanni.”

 

Naalakkersuisoq Ane Lone Bagger ima oqaaseqarpoq:

 

”Aallaqqaammut nuannaarutigeqaara nunanut allanut ministerip toqqarneqarnerminit piffissaq sivikitsoq qaangiuttorlu Kalaallit Nunaannut tikeraarnera, tassuunami takutinneqarmat danskit naalakkersuisuinit Kalaallit Nunaat soqutigineqarluartoq. Nuup Københavnillu akornanni qaninnerusumik naligiinnerusumillu qanimut suleqatigiinnissamut isumalluaatissaqarpunga. Tassani timitaliinissaq pingaaruteqarpoq suleqatigiinnerup nukittorsarnissaata qanoq isikkoqarnissaanik sulinerup aallartinnissaa. Ilutigalugu naqissuserusuppara uagut tassaagatta Naalagaaffeqatigiinnermi Issittumi najugaqartuusut. Tassaavugut uagut Issittumi allannguutinik kingunerisaanillu maluginnittut. Taamaattumik Naalakkersuisunit Kunngeqarfiup Issittumut periusissiaanut piginneqataasutut misigisimanissarput Kalaallit Nunaatalu soqutigisaasa pingaartinneqarnissaat Naalakkersuisunut aalajangiisuuvoq”.

 

Annertunerusumik paasisaqarusukkussi:

Nunanut allanut ministerimut Jeppe Kofod:

Anders Vestergaard Kaldan, +45 20 59 21 80

 

Ilinniartitaanermut, Kultureqarnermut, Ilageeqarnermut Nunanullu allanut Naalakkersuisoq Ane Lone Bagger:

Rosa Thorsen, +299 55 33 03