Anders Olsen-imut oqaaseqaat

Allattoq Ineqarnermut Attaveqaqatigiinnermullu Naalakkersuisoq Karl Frederik Danielsen

Asasara Anders Olsen.

 

Kiffartuunneqarnissamut isumaqatigiissutit sammineqalerseqqikkakkit qujanaq. Internettikkut tusagassiuummi Sermitsiaq.AG-imi ilanngutassiami ulloq 17. oktober 2019 oqarsimasutut issuarneqarputit ”Angallannikkut kiffartuussinissamik isumaqatigiissutit… maannamullu ajornartorsiutinik atugassaqartitsiuarnera aamma takusinnaajuarlutigu”.

 

Naalakkersuisut aamma taamatut isumaqarput. Taamaattumik 2019-imi aamma 2020-imi sumiiffinni kiffartuunneqarnissamut isumaqatigiissuteqarfiusuni sullissinerup pitsanngorsarneqarnissaanut 8 mio. koruuninik atugassanngortitsinissamut siunnersuut Naalakkersuisut suliareqqammerpaat.

 

Kiffartuunneqarnissamut isumaqatigiissutinut aningaasassanik salliutitsisoqassasoq, isumaqatigiittoqarmat nuannaarutigaara.

 

Aningaasassanik immikkoortinneqareersunik atugassanngortitsinissamut siunnersuut 2019-imi upernaakkut Aningaasaqarnermut Akileraartarnermullu Ataatsimiititaliamut nassiuppara. Tamanna ajoraluartumik akuerineqanngilaq.

 

Borgmesterit aammalu sullissisut aamma Inatsisartut oqaloqatiginerat tunngavigalugu pitsanngorsaanissamut siunnersuutit pitsaasut tamaasa pingaarnersiuiffigisariaqarsimavakka.

 

Maannakkut aningaasat aningaasaliissutigineqareersut atugassanngortinneqarnissaannut siunnersuut nutaaq Aningaasaqarnermut Akileraartarnermullu Ataatsimiititaliamut nassiunneqareerpoq.

 

Siunnersuummi maannakkut pitsanngorsaanissat, kisianni aamma siunissami pitsanngorsaanerit, utoqqaat, innarluutillit aamma ilaqutariit meerartallit aqqutissaannut tunngasut pitsaanerulersinnissaat salliutippakka. Aammattaaq pingaartumik utoqqaat pitsaanerusunik angalanermi atugassaqartinneqarnissaat pingaartinneqarpoq.

 

Immersuinerpassuit Naalakkersuisut tigusimasaat, soorunami aamma kiffartuunneqarnissamut isumaqatigiissutissat piareersarneqarneranni maannakkut ilaatinneqareerput, tassani isorliunerusut aamma sammineqarlutik.

 

Naalakkersuisut maannakkut ataatsimiititaliap suliarinninnera utaqqivaat.

 

Paasissutissanik annertunerusunik piniarnermi saaffigineqassaaq Naalakkersuisup allattaa Anders Samuelsen uunga ansa@nanoq.gl.