Sisorartitsilluni takornariartitsisalernissamut akuersissummik pissarsinissamut qinnuteqaqqussut

Matumuuna Maniitsup avannaata tungaani Sermersuarni sumiiffinni sisorarnermik timersuuteqarnermut, unnuisitsisarnernut, allanillu takornarissat suliaqartinnerinut tunngatillugu takornariartitsinermik suliaqarnissanut akuersissut pillugu qinnuteqarniartunut Qeqqata Kommunianik suleqateqarlutik Naalakkersuisut qaaqqusipput

Sermersuarni sisorarnermik takornariartitsinerup neqeroorutiginissaanut kisermaassisinnaanermik ilaqartumik akuersissutip qinnutiginissaanut innuttaasut suliffeqarfiillu soqutiginnittut qaaqquneqarput. 

Maniitsup avannaata tungaani Sermersuarni immikkut atuisinnaanermut kommunip pilersaarusiorfigineqarnerani tapiliussaq nr. 30-ikkut (kommunip pilersaarutaanut tapiliut) sumiiffinnut akuersissuteqarfiusussanut Qeqqata Kommunia sumiiffinnik atugassiassanngortitsisimavoq. Kommunip pilersaarutaanut tapiliut tassaavoq Qeqqata Kommunianut 2012-2024-imut Kommunip pilersaarutigisaanut tapiliut. Sisamanngorneq ulloq 16. januar 2020mi sumiiffimmi nal. 23.59, Kalaallit Nunaanni Nuummi qinnuteqaat Inuussutissarsiornermut, Nukissiuuteqarnermut Ilisimatusarnermullu Naalakkersuisoqarfimmiit tiguneqareersimassaaq.

Akuersissummut sumiiffinnik atugassiineq takornariartitsinermik suliassaqarfimmut Naalakkersuisut periusissiaannut ilaatitatut isigineqassaaq, taanna nunatsinni takornariartitsinermik inuutissarsiorfimmi namminersuutigisatut aningaasaliinernik annertusaanissamik, taamaalillunilu piffissamut ungasinnerusumut siuarsarnermik suliffeqartitsinermillu annertusaanissamik siunertaqarluni. 

Qaaqqusissutitut allakkat akuersissuteqarnissamullu atortussat allat, piumasaqaatinik, malittarisassianik atugassarisanillu tamanik imaqartut, ilanngullugit qinnuteqarnissamut immersugassaq aamma qinnuteqarnermut ilitsersuut matumani pissarsiassaapput: 

https://www.businessingreenland.gl/kl-GL/Udbud/Aktuelle-udbud/Koncession-til-skisportsaktiviteter-ved-Sukkertoppen-Iskappe

Ulloq sisamanngorneq 28. november 2019 tikitsinnagu qaaqqusissutitut allakkanut ilanngussanullu apeqqutit e-mailikkut Inuussutissarsiornermut, Nukissiuuteqarnermut Ilisimatusarnermullu Naalakkersuisoqarfimmut saaffiginnissutaassapput, uunga: isiin@nanoq.gl 

Apeqqutit tiguneqartut tamaasa, taakkununngalu akissutaasut kinaanermik ilisarnarunnaarsarlugit Naalakkersuisut nittartagaatigut tamanut saqqummiunneqarumaarput.