Utoqqalinersiat annikillisinnagit utoqqalinersiallit aningaasarsiornerusinnaanngussapput

Utoqqalinersialik kisermaaq utoqqalinersiat 140.000 kr.-iusut sunnerneqartinnagit 166.000 kr.-inik siunissami aningaasarsisinnaanngussaaq. Taamaammat utoqqalinersialik utoqqalinersiap annikilliartortinneqannginnerani 306.000 kr.-inik aningaasarsisinnaassaaq. Imaappoq aningaasarsiarisinnaasaat 100.000 kr.-inik amerlissapput, tamannalu pingaaruteqartumik pitsannguutaasussaammat Naalakkersuisut massakkut ukiaanerani ataatsimiinnermi akuersaarneqallaqquaat.

Allatut oqaatigalugu assersuutigalugulu perorsaasumut ikiortip imaluunniit suliffissuarmi sulisup, naak suliinnarsinnaanissani attatiinnaraluarlugu, utoqqalinersiani tamakkerlugit tigusinnaassavai.
Perorsaasutut ikiorti kisermaaq assersuutigalugu ukiumut 175.000 kr.-inik sulinermigut isertitsitsisartoq, qaammammut akileraarutit ilanngaatigineqannginneranni 7.430 kr.-inik pisartup akileraarutit ilanngaatigineqannginneranni 11.404 kr.-it qaammammut pisalissavai.

Utoqqalinersiaqartitsisarneq unitsinneqartassaaq 533.688 kr.-inik isertitaqarsimagaanni, illuatungaani ullumikkut utoqqalinersiaqartitsisarnermik unitsitsisarnermut killiliussaq 349.414 kr.-iusoq.

Naalakkersuisut anguniagaat
Inunnut atugassarititaasut pitsanngortinneqarnissaat Naalakkersuisut anguniarpaat. Aningaasarsiornerup siuariartornerata ingerlaannarnissaata, suliffissat nutaat pilersinneqarnissaasa inuillu sulisinnaasut amerlanerusut sulinissaasa qulakkeerneqarnissaat kissaatigaarput. Kingullertut taasaq siunnersuut manna aqqutigalugu anguneqassaaq, taassumalu utoqqalinersiallit peqqissut suliffeqarfeqarfimmiiginnarnissaat kajuminnarnerulersissavaa.

Isertitakinnerusunut utoqqalinersialinnullu akunnattumik isertitaqartartunut iluaqutaasussatut siunnersuut manna Naalakkersuisut saqqummiuppat.

Isumaginninnermut Inatsisinillu Atuutsitsinermut Naalakkersuisup Martha Abelsenip aningaasanut inatsit pillugu isumaqatigiinnermi peqataasut atituumik isumaqatigiissuteqarnerisa kingunerisaanik siunnersuusiortoqarmat iluarisimaarpaa.

- Utoqqalinersiaqartitsineq inuiaqatigiinni akissarsiakinnerpaanut siullerpaamik ikiuutitut eqqarsaatigineqarpoq, taakkumi ukiorpassuarni sulereersimallutik utoqqalinersisartunngornissartik kissaatigaat. Utoqqalinersiallit saniatigut qaffasissumik akissarsiallit suliffeqarfeqarfimmiiginnarnissaminnut “pisortanit akilikkamik iluanaarutisinneqassappata” isumaqarpunga eqqunngitsoq.

- Qaffasinnerpaamik aningaasarsiallit akornuteqanngitsumik imminnut pilersorsinnaapput. Aamma inuiaqatigiit aningaasaataat atulersinnagit eqqarsarluartariaqarpugut, Martha Abelsen naggasiivoq, taanna Ilaqutariinnermut Peqqissutsimullu Ataatsimiititaliamik siunnersuut pillugu aalajangersimanerusunik oqaloqatiginneqqammerpoq.

Attavissaq
Paasisaqarnerorusukkuit naalakkersuisup allattaa Inger Heilmann Larsen e-mailikkut: ihla@nanoq.gl imalulunniit oqarasuaatikkut + 299 554160-it attavigiuk