Kangerlussuup ingerlanneqarnissaa

Kangerlussuup ingerlaqqinnissaa pillugu Naalakkersuisut aamma Illersornissamut Ministeriaqarfiup akornanni suleqatigiissitap ukiumi tulliuttumi mittarfiup qanoq ililluni Illersornissaqarfimmut atugassiissutigineqarsinnaaneranut najoqqutassiaq suliarissavaa.

 

Tamatumunnga atatillugu Illersornissamut Ministeri Trine Bramsen 7. oktober 2019-imi imatut KNR-imut Sermitsiamullu oqaaseqarpoq:

 

Kangerlussuup Mittarfia Illersornissaqarfiup timmisartuinut pingaaruteqarpoq, aammalu piffimmi silap pissusaa alapernaarsuisinnaanissatsinnut, oqartussaaffinnik atuutsitsinermi suliassatsinnut aamma ujarlernissatsinnut annaassiniarnissatsinnullu pissutsinik pitsaanerpaanik pilersitsisarpoq. Suleqatigiissitamik aningaasaqarneq pillugu sukumiisumik misissuisussamik pilersitsisoqarpoq. Illersornissaqarfiup akisussaaffigiligassamini tamatumunnga, tassungalu ilanngullugu nalunngilaa ilisimallugulu iluarsaassinissamut mittarfiullu ingerlaqqinnissaanut atatillugu aningaasartuuteqartussaasoq”.

 

Naalakkersuisoq Karl Frederik Danielsen oqarpoq: ”Illersornissamut Ministerip Trine Bramsenip 7. oktober 2019-imi oqaaseqarnermini uppernarsarpaa, mittarfiup iluarsaanneqarnissaanut ingerlateqqinneqarnissaanullu aningaasartutinut Illersornissaqarfiup akiliinissaminik paasinninnera pillugu Naalakkersuisut Naalagaaffiullu akunnerminni ataatsimut paaseqatigiissutigigaat.”

 

Annertunerusumik paasisaqarusunnermi Naalakkersuisumut allatsi Anders Samuelsen ansa@nanoq.gl aqqutigalugu attaveqarfigineqassaaq.