Naalakkersuisut nunanit allanit aningaasaliisartut Kalaallit Nunaannut aggersarpaat


Naalakkersuisut Issittoq pillugu nunarsuarmi ataatsimeersuarnerit annersaanni Arctic Circle Assemblymi peqataapput, taannalu Reykjavikimi Islandimiittumi oktoberip qulinganit aqqaneq aappaannut ingerlanneqarpoq. Tassani Naalakkersuisut nunani allani aningaasaliisartut Kalaallit Nunaat aningaasaliivissatut periarfissatut takunissaanut aggersaapput.

Naalakkersuisut Siulittaasuat Kim Kielsen aammalu Ilinniartitaanermut, Kultureqarnermut, Ilageeqarnermut Nunanullu allanut Naalakkersuisoq Ane Lone Bagger Arctic Circle Assemblyp 2019 ammarneqarnerani sisamanngornermi marluullutik peqataapput, tassani ataqqinaammik qaaqqusaavoq oqalugiartuullunilu Kronprinsesse Victoria Sverigemit.

Ukiut tamaasa inuit 2000 sinnillit nunanit assigiinngitsunit 60-ineersut Arctic Circle Assemblymut peqataasarput, tassani Issittup siunissaa pillugu oqaloqatigiinneq suleqatigiinnerlu anguniarneqartarluni. Ataatsimeersuarneq tamanut ammasuusarpoq, tassanilu nunat siuttui, kattuffiit, inuussutissarsiortut, ilisimatusarfiit, nunat inuii, innuttaasut ernumasut allallu Issittumut soutiginnittut peqataasarlutik. Arctic Circle Assembly Naalakkersuisunut oqalliffittut pingaaruteqarpoq, tassani Kalaallit Nunaat nunanut allanut nammineerluni saqqummersinnaasarpoq.

Naalakkersuisut Siulittaasuat Kim Kielsen tikilluaqqusilluni oqalugiarpoq, tassani siulittaasup erseqqissarpaa Kalaallit Nunaat nunanik allanik niueqateqarnissamut ammasoq. Siulittaasup naqissuserpaa ineriartortitsinermi ingiaqatigeeqqissaarnissaq pisariaqartoq avatangiisitta illersorneqarnissaat pillugu. Ilanngulluguttaaq siulittaasup pingaartillugu tikkuarpaa imaani plastikinik ajornartorsiuteqarneq, tassami plastikkit tappiorannartui annertuumik ajornartorsiutaalersimapput allaat aalisakkani pisarisartakkatsinni takussaallutik. Naalakkersuisut Siulittaasuat inersuarmik saqqummiussani pillugit, tamatumalu kingorna apeqqarissaarneqarnermini akissutai pillugit annertuumik ersaattaaffigineqarpoq.

Naalakkersuisoq Ane Lone Bagger sisamanngornermi Greenland Venturep pisortaa Karsten Høy aamma Royal Arctic Linep pisortaa Verner Hammeken peqatigalugit ataatsimeersuarfiup inersuaani anginermi Inga Dora Gudmundsdottirimit aqunneqarlutik saqqummiipput, qulequtaralugu ’Greenland – Open for Business’, tassani Kronprinsesse Victoria tusarnaartullu allat hundredelikkaat peqatigalugit malinnaalluarfigeqqissaarneqarput.
Ane Lone Baggerip oqariartuutigaa Kalaallit Nunaata pisinnaasai oqartussaaffiillu Namminersorlutik Oqartussanit tamakkiisumik oqatussaaffigileriigaat aqqutigalugit nunanik allanik oqaloqateqarlunilu isumaqatigiissuteqarsinnaasoq. Taamatuttaaq atortulersuutitigut, takornariaqarnikkut aatsitassatigullu Naalakkersuisut suliniutaat saqqummiuppai.

Tassani Ane Lone Baggerip Kalaallit Nunaanut aningaasaliinissamut kaammattuivoq, tassuuna aningaasatigut ineriartorneq aqqutigalugu inuiaqatigiit iluaquserneqarsinnaanerat eqqaallugu. Greenland Venture aamma Royal Arctic Linep mittarfissat nutaat Nuummilu Sikuki talittarfik Kalaallit Nunaata nunarsuarmioqatigiinnik niueqateqarsinnaanerannut aalajangiisuusut, taamaalillunilu inuiaqatigiit aningaasatigut ineriartorneranut iluaqutaasussatut oqaatigaat.

Annertunerusumik paasisaqarusukkuit naalakkersuisut allattaanut attaveqarsinnaavutit Steve Sandgreen stev@nanoq.gl +299 596659

Imaluunnit naalakkersuisut allattaat Rosa Thorsen, rosath@nanoq.gl +299 553303


Assit /foto : Arctic Circle