Stine Egedep AG-mi ulloq 9. oktober 2019-imi saqqummersumi atuartartutut allagaanut naqqiissut



Inatsisartunut ilaasortaq Stine Egede AG-mi ulloq 9. oktober 2019-imi saqqummersumi atuartartut allagaanni Naalakkersuisut aningaasaqarnikkut politikianni ”kommuninut ataatsimoortumik tapiissutinik annikillisaanissaq kissaataasoq” tamannalu innarluutillit pillugit inatsisip nutaap atuutilersinneqarneranut annertuumik kinguneqassasoq allaaserinnippoq. Tassungalu atatillugu suut piviusuunersut erseqqissaatigissavakka.

Innarluutillit pillugit inatsimmut nutaamut atatillugu kommunit 2020-mi 25 mio. kr.-t missaannik, innarluutilinnut tunngasuni aningaasartuutaanerusussatut naatsorsuutigineqartunut matussutissatut aningaasaliivigineqassapput. Aningaasaliissutit qaffaataasa taakku kingunerannik innarluutilinnut immikkoortup 2011-mi kommuninut nuunneqarnerata kingorna kommunit ukiumut 500 mio. kr.it immikkoortumik ingerlatsinissaannut atugassatut aningaasaliivigineqarput. Kommuninut ataatsimoortumik tapiissutit 2020-mi 11,2 mio. kr.-nik amerlineqassapput, taakkullu ataatsimut aningaasaliissutaasut 0,7 procentiannik naleqarput. 2020-mi kommuninut ataatsimoortumik tapiissutit katillugit 1,5 mia. kr.-t missaannik amerlassuseqassasut naatsorsuutigineqarpoq.

Pisortat ingerlataasa nalinginnaasut pisariillisarneqarneranni kommunit peqataanissaat Naalakkersuisut nikerartut aningaasaqarnikkut politikkianni ukiuni arlaqartuni anguniagaavoq. Pisortat ingerlataasa pisariillisarneqarnissaat ukiuni makkunani aalajangiusimaneqarluni piumasaqaataavoq. Kommunillu suliassami taassani nammaqataatinneqannginnissaat takorlooruminaappoq. Tamannarpiarlumi pissutigalugu partiit 2019-imut aningaasanut inatsit pillugu isumaqatigiissuteqartut pisortat ingerlatsiviata pitsaanerusumik aningaasartuutinik atuinissaa, ingerlanneqarluarnissaa, kiisalu tunngaviusumik sullississutinik naammassinninnissamut uukkatarinnittuunissaa isumaqatigiissutigaat. IA-p siusinnerusukkut isumaqatigiissummi tassani immikkoortut pingaarutillit tunuarterfiginerisigut sumiginnarpaa, Stine Egedellu atuartartut allagaanni allagaatigut partiip pisortat ingerlatsiviannik pisariillisaanissamut nutarterinissamullu atatillugu aalajangiinissanut pisariaqartunut sapiissuseqannginnera ilisimasaqannginneralu ajoraluartumik ersersinneqarpoq.

Taamaammallu aamma Stine Egedep tunngavilersuutimini Kalaallit Airports A/S-ip ataani mittarfiliortitsinernik peqqinnissaqarfiullu aningaasartuutaasa tatineqarnerannik ilanngussinera eqqunnginnerassavara. Pisortat ingerlatsivianni pisariillisaanissamik pisariaqartitsineq inuiaqatigiit aningaasaqarnerata patajaatsuutinnissaanut ajornartorsiuteqarnermik innuttaasullu agguaqatigiissillugu ukiuisa qaffakkiartornerannik aallaaveqarpoq. Mittarfiliortiternerillu siunissamut sanaartornikkut aningaasaliinerupput takornariat amerlinerannik siuarsaallutillu nunatsinni innuttaasunut iluaqutaasumik angallannermik akikinnerusumik pilersitsiviusussat. Taamaalillunilu mittarfiliortiternernik suliniutit siunissami ingerlatsinermi sipaaruteqarnissanik pisariaqartitsinissanut annikillisaataassapput. Taamaammallu Stine Egedep akerliliiniarnermi mittarfiliortiternerit sipaarniarnernut pisariillisaanissanullu patsisaanerannik oqariartuuteqarnera eqqunngitsuliorneruvoq. Taamaattoqanngilarmi.

Inussiarnersumik inuulluaqqusillunga


Vittus Qujaukitsoq


Attaveqarfissaq: Naalakkersuisup allattaa Bolethe Rasmussen, bora@nanoq.gl