Aqutsisoqarfimmi pisortaq nutaaq

Pitsaaliuinermut Isumaginninnermullu Aqutsisoqarfik nutaamik pisortartaalerpoq, pisortassatullu toqqarneqarsimavoq Helene Broberg Berthelsen.

Helene Broberg Berthelsen Kommuneqarfik Sermersuumi Meeqqanut Atuarfeqarnermullu pisortatut atorfimminngaanneerpoq.

Aqutsisoqarfimmi pisortassamik, periutsit pillugit taama annertutigisumik pisinnaasalimmik, kommunimi ingerlatsinermik annertuumik ilisimasalimmik aamma Pitsaaliuinermut Isumaginninnermullu Aqutsisoqarfiup suliassaataasa annertuut piviusunngortinnissaanut piginnaasalimmik nassaarsimanini Pitsaaliuinermut Isumaginninnermullu Aqutsisoqarfiup nuannaarutigaa.
Naalakkersuisut sumiginnaanerup pitsaaliorneqarnissaa pillugu suliniuteqarneri, meeqqat inuusuttullu aarlerinartorsiortut pillugit suliniutaasa patajaallisaaffiginissaat kiisalu inuttaasut peqqissusaat pillugu pilersaarutip piviusunngortinnissaa suliassat annertuut ilagaat.

”Pitsaaliuinermut Isumaginninnermullu Aqutsisoqarfiup suliassaanik amerlasuunik pingaaruteqartunillu kivitassaanik ingerlatitseqqiilluni suleqataasussaq aqutsinermi pisortaq taama piginnaasaqarluartigisoq atorfinitsissinnaagatsigu nuannaarutigeqaara. Naalakkersuisut kinguaariit tulliuttut pillugit pitsaasumik ineriartortitsinermik suliaqarnerisa qulakkeerneqarnissaannut Helene Broberg Berthelsenip kommunit suliassaqarfiinut annertuumik ilisimasaqarnera assorsuaq iluaqutaassaaq”, Naalakkersuisoqarfimmi pisortaq Julie Præst Wilche oqarpoq..

Helene Broberg Berthelsen atorfimmi sulilissaaq 1. januar 2020.

Paasisaqarnerorusukkuit Naalakkersuisoqarfimmi pisortaq Julie P Wilche, Isumaginninnermut Inatsisinillu Atuutsitsinermut Naalakkersuisoqarfik, attavigineqarsinnaavoq, mobilikkut: +299 551190, e-mailikkullu: jprw@nanoq.gl