Kalaallit Nunaannilu meeqqanut inuusuttunullu isumaginninnikkut aarlerinartorsiortunut ikiuisussaq aallartinneqarpoq

Oqartussaasoqarfiit assigiinngitsunik suliallit akornanni ataatsimoorussamik suliaq innersuussiffiusussaq Kalaallit Nunaannilu meeqqanut inuusuttunullu isumaginninnikkut aarlerinartorsiortunut ikiuisussaq aallartinneqarpoq

Peqqissutsimut, Isumaginninnermut Inatsisinillu Atuutsitsinermut Naalakkersuisup (naalakkersuisunut ilaasortap), Martha Abelsenip, aamma social- og indenrigsministerip, Astrid Kragip, oqartussaasoqarfiit assigiinngitsunik suliallit akornanni suleqatigiinneq ataatsimoorussaq aallartippaat, taassumalu Kalaallit Nunaanni meeqqat inuusuttullu isumaginninnikkut aarlerinartorsiortut pillugit pissutsit pitsanngortinneqarnissaannut innersuutit suliarissavai.

Oqartussaasoqarfiit assigiinngitsunik suliallit akornanni kalaallit – qallunaallu suleqatigiittussat pillugit Naalakkersuisut qallunnaat naalakkersuisui suleqatigalugit suliaq aallartippaat. Kalaallit Nunaanni meeqqanut inuusuttunullu isumaginninnikkut aarlerinartorsiortunut pissutsit qanoq pitsanngortinneqarnissaat pillugu innersuussutit aaqqiissutissatullu siunnersuutit 2020-imi ukiup affaani siullermi tunniunnerisigut suliaq naammassineqassaaq.

Piffissaq ungasinnerusoq eqqarsaatigalugu Kalaallit Nunaanni meeqqanut inuusuttunullu isumaginninnikkut aarlerinartorsiortunut, pingaarnertullu meeqqat inuusuttullu sumiginnarneqartut innarlerneqartulluunniit pillugit, suliniutit qanoq ilillutik patajaallisarneqarsinnaanersut sulinermi ukkatarineqassaaq. Meeqqanut inuusuttunullu toraagalinnik suliniutit saniatigut, aamma inersimasunut innarliisimasunut suliniutit ukkatarineqassapput. Pitsaaliuinermi suliniuteqarnerit atituut qanoq ilillutik patajaallisarneqarsinnaanerat pillugu innersuussutinik aamma suliaq kinguneqassaaq.

Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen oqarpoq:
- Kalaallit Nunaannit Danmarkimillu oqartussaasoqarfiit assigiinngitsunik suliallit akornanni suleqatigiinneq massakkut aallartitarput Naalakkersuisut Danmarkimut saaffiginninnerata kinguneraa, suliamilu Kalaallit Nunaanni meeqqanut inuusuttunullu pissutsit qanoq ililluta pitsanngortinniarnissaat ukkatarineqassaaq. Ataasiinnarmik aaqqiissutissaqanngilaq, aaqqiissutissalli amerlapput. Sulinermi amerlasuut ilanngunneqassapput – Kalaallit Nunaannilu meeqqat tamarmik toqqissisimasumik, peqqissumik pitsaasumillu meeqqatut inuuneqarnissaat akisussaaffittut tigussallugu. Suliap taassuma malinnaaviginissaa qilanaaraara, innersuussutit aaqqiissutissatullu siunnersuutit takunissaat qilanaaraattaaq – takkulu malitseqartinneqarnissaat qulakkiissavara.
Social- og indenrigsministeri, Astrid Krag oqarpoq:
- Kalaallit meerartaat inuusuttaallu innarlerneqarsimasut sumiginnarneqarsimasullu ataatsimoorluta ikiussavagut tapersersorlugillu, siunissamilu innarliinerit sumiginnaanerillu pitsaaliussavagut. Suleqatigiit aqqutigalugit piffissaq ungasinnerusoq eqqarsaatigalugu aaqqiissutissat Kalaallit Nunaanni meeqqat inuusuttullu isumaginninnikkut aarlerinartorsiortut taakkualu ilaqutaasa atugarissaarnerulernissaannik toqqissisimanerulernissaannillu kinguneqartussat Naalakkersuisut peqatigalugit ukkatarissavagut.
Piviusut:
Sulineq sammivinnik pingasunik sammivilerlugu aaqqissuunneqassaaq:

- Pissutsit meeqqamut pingaaruteqartut, inooqatigiinni suliniutit kisiisa eqqarsaatigalugit aamma oqartussaasoqarfiit assigiinngitsunik suliallit akornanni suleqatigiinnermit suliniutigineqartut, Kalaallit Nunaannilu meeqqat inuusuttullu atornerlunneqartarnerannut pitsaaliueqataasussat kiisalu meeqqanut inuusuttunullu innarlerneqarsimasunut imaluunniit sumiginnarneqarsimasunut suliniutit pitsaanerulersinneqarnissaannut suliniutit tunngassuteqartut suliarineqassapput. Tassani ilaatigut sulisunik suliamik suliaqartunik ilinniartitsineq/ilinniartitseqqinneq, ilaqutariinnut ineqarnikkut pissutsit pitsaanerusut il.il. pineqassapput.

- Pissutsit inersimasumut kannguttaatsuliortumut, sumiginnaasumut il. il. pingaaruteqartut. Sammivik inersimasut innarliinissaannik pitsaaliuinernik ilaatigut suliniutinik imaqassaaq. Sammivimmi immikkut inatsisinik atuutsitsinermi suliassaqarfik ukkatarineqassaaq, assersuutigalugu innarliisoqarsimatillugu pinerluttoqarsimanernik paasiniaanerit, kisianni aamma suliassaqarfiit allat aamma pissutsit soorlu kannguttaatsuliortut pitsaanerusumik katsorsartalerneqarnissaat sammivimmi ukkatarineqassallutik.

- Atituumik pitsaaliuinermik suliniuteqarneq. Tassani ilaatigut nalinginnaasumik kisiannili aamma atitunerusumik suliniuteqarneq pineqarpoq, taakkunani inuiaqatigiit avatangiisigineqartut ukkatarineqassallutik, assersuutigalugu paasititsiniaanerit aamma ilisimasat annertusarneqarnerat aqqutigalugu.

Kommissoriumimut linki


Paasissutissat annertunerusut

Tusagassiinernut sulisoq Nanna Lodberg Theut, nlot@sm.dk, +45 41 85 10 05

Peqqissutsimut, Isumaginninnermut Inatsisinillu Atuutsitsinermut Naalakkersuisup Martha Abelsenip (Kalaallit Nunaat) allattaa Inger Heilmann Larsen: e-mail: ihla@nanoq.gl imaluunniit oqarasuaat + 299 554160