Ittoqqortoormiini oqaluffiup ammaqqinneqarnera

Ittoqqortoormiuni oqaluffik ukiuni marlunni matoqqareerluni innuttaasunut nuannaarutaaqisumik atorneqaqqissinnaanngorpoq.

Ukiuni taakkunani marlunni, sillimaniarneq pissutigalugu oqaluffiup matoqqanerani Ittoqqortoormiini innuttaasut illoqarfiup oqaluffiannik kusanaqisumik atuisinnaasimanngillat. Oqaluffiup iluarsartuunneqarnerata naammassinissaata tungaanut oqaluffimmi suliassat katersortarfimmi suliarineqartarsimapput. Oqaluffimmi pisartut oqaluffimmi ingerlanneqaqqittalernissaat anguniarlugu sanasut aasaq tamaat oqaluffiup iluarsartuunneranik ulapputeqarsimapput.

Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq Ane Lone Bagger ima oqaaseqarpoq: "Oqaluffiup kusanaqisup oqaluttuarisaanermi illoqarfimmut annertuumik pingaarutillip iluarsartuunneqarsimanera taamalu oqaluffimmi pisartut oqaluffimmi ingerlanneqaqqittalernissaannut innuttaasut periarfissaqaqqilernerat assut nuannaarutigaara."

Ilinniartitaanermut, Kultureqarnermut Ilageeqarnermullu Naalakkersuisoqarfiup aamma ilisimatitsissutigaa, qummuattamik tooqqartarneq arsallu siaruarternissaanik Namminersorlutik Oqartussat nalunaarutaat nr. 11, 1. oktober 2019-imeersoq maanna atuutilersimasoq. Qummuattamik najukkami oqaluffiup allaffianiunngitsoq allamili utaqqiisaasumik toqqortaateqartarneq aamma qummuattamik isumannaatsumi toqqortaateqarnissaq, tassunga ilanngullugit arsat Kalaallit Nunaanni siaruarternissaannut akuersissummik nalunaaruteqarnissamut akuersissummillu qinnuteqarnermut periaasissatut ilusissatullu piumasaqaatit pillugit malittarisassat nalunaarummi aalajangersarneqarsimapput.

Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq ima oqaaseqarpoq: "Inuup toqunerani qanoq pisoqarnissaanut tunngatillugu inuttut annertunerusumik periarfissaqarsinnaanissaq kissaatigineqarsimavoq. Toqusup taassumalu ilaqutaasa kissaataasa annerusumik piviusunngorsinnaanerat nalunaarut manna aqqutigalugu maanna periarfissaalerpoq tamannalu assut nuannaarutigaara, tassami pisut ilaqutariit kammalaatillu akornanni aliasuutigineqartut naggaserluarneqarnissaat pingaaruteqarpoq."

Nalunaarut oktoberip aallaqqaataani atuutilerpoq www.inatsisit.gl -imilu nassaarineqarsinnaalluni

Attavigisaq:
Line Hasselriis (Ilinniartitaanermut, Kultureqarnermut Ilageeqarnermullu Naalakkersuisoqarfik)
Toqq/direkte 345708
LAND@nanoq.gl