Nammineq pisuussutiginngisamik suliffeqanngiffiusumi sulilluni aningaasarsiassanik annaasaqarnermi aningaasaqarnikkut taartisiassat

Sulisut angerlartinneqartut, tunisassiornerup unitsinneqarnerat pissutigalugu suliffeqarfimmit tassanngaannartumik isertitaaruttut, pisortanit suliffeerunnermi ikiorsiissutinik tigusaqarnissamut periarfissaqarput. Tunisassiornerup unitsinneqarnera tassaasinnaavoq, pisut naatsorsuutigeriinngisat pissutigalugit suliffeqarfiup matugallarneqarnera, oqarpoq Aatsitassanut Suliffeqarnermullu Naalakkersuisoq, Erik Jensen.


Suliffeerunnermi ikiorsiissutinik tigusaqarnissamut piumasaqaatit
Aningaasarsiaqartartoq tunisassiornerup unitsinneqarnera pissutigalugu aningasarsiaqartinneqarani angerlartinneqaruni, pineqartoq inatsisit malillugit suliffeerunnermi ikiorsiissutinik pisinnaatitaavoq, piumasaqaatit makkua naammassineqarsimappata:

- sapaatit akunneri kingulliit 13-it ingerlaneranni ikinnerpaamik nalunaaquttap akunnerini 182-ini sulisimagaanni
- 18-inik ukioqalersimagaanni imaluunniit pilersuisuugaanni
- Kalaallit Nunaanni inuit allattorsimaffiannut nalunaarsorsimagaanni

Inuit angerlartinneqartut angerlartinneqarnermi ulloq siulleq suliffeerunnermi ikiorsiissutinik qinnuteqarniarlutik Majoriamut saaffiginneqquneqarput.

Royal Greenland-imi sulisut aningaasarsiassai annaaneqartut Nukissiorfiit matussusertariaqaraat pillugu Uummannami SIP-p ulloq 4. oktober 2019 oqaaseqarneranut tapiliullugu annertunerusumik paasissutissiilluni Naalakkersuisoq Erik Jensen taamatut oqarpoq.




Paasissutissanik annertunerusunik piniarnermi attaveqarfissaq

Jørgen T. Hammeken-Holm
Naalakkersuisoqarfimmi pisortaaneq
JOEH@nanoq.gl
Toqq/direkte 34 68 46