Innuttaasut persuttaanermut taarsiullugu allanik iliuuserisinnaasarsiorneranni Alliaq ikiuuppoq

Qanigisariinni persuttaasartunut Alliaq neqeroorutaavoq. Arnat angutillu amerlasuut persuttaasarnermik kamajassusermillu ajornartorsiuteqartut neqeroorutip ikiortarsimavai

Ullumikkut oktoberip aappaani Naalagaaffiit Peqatigiit persuttaannginnissamut ullorititaannut atatillugu katsorsarneqarnissamik neqeroorutip Alliap iluatsilluarsimanera nersualaarneqassaaq.  Alliami inuit persuttaasarnermik ajornartorsiuteqartut persuttaanermut taarsiullugu allanik iliuuserisinnaasarsiorneranni tarnip pissusaanik ilisimasallit ikiuisarput.

 

Aviaq Kleist Sethsen tarnip pissusaanik ilisimasalittut Alliami sulivoq.  Inuit katsorsarsimasani paasisimasaqarnerulersartut sakkussallu amerlanerusut pissarsiarisaraat, taamaalillutillu persuttaanermik pissusilersortarnertik allanngortinniarlugu pitsaasumik tunngavissaqalersartut taassuma oqaluttuaraa:

 

“Innuttaasunut Alliaq pitsaasorujussuarmik neqeroorutaasoq uanga isumaqarpunga. Sullitatsinni katsorsartittuni kamajanertik kamajassusertillu aqunniarlugu ikiorneqarsinnaanertik annertuumik allannguinissaminnut kajumissaatitut isigisaraat qujassutigisaqigaallu takusinnaasarparput.   Sullitagut assigiinngitsorujussuupput: angutit, arnat, utoqqaanerusut aamma inuusunnerit sullitaraagut.  Tamarmik sooq taama pissusilersortarnertik pitsaanerusumik paasisinnaalersarpaat, kiisalu pissusilersortarnertik allanngortinniarlugu sakkussanik pisarlutik” tarnip pissusaanik ilisimasalik Aviaq Kleist Sethsen oqarpoq.

 

Alliami tamakkiisumik piffissarlu ungasinnerusoq isigalugu sulisoqartarpoq.  Inuit persuttaasartut neqeroorummi ukkatarineqarput taakkulu persuttaasarunnaarnissaannut ikiortarlugit.  Taamaaliorluni innuttaasut taakku ilaqutaasalu siunissamik persuttaaffiunngitsumik inuuneqalernissaat qulakkeerneqartarpoq.

 

“Alliami katsorsartissimavunga.  Assorsuaq tassani ikiorneqarpunga.  Tamanna sapaatit akunnerinik 10-nik sivisussuseqarpoq, tassani kamaqarnera pillugu tarnip pissusaanik ilisimasalimmik oqaloqateqartarpunga.  Sunannguugaluartorluunniit kamassutigisarpara.  Maannali tarnip pissusaanik ilisimasalimmit oqaloqateqartarnikkut tamanna pitsaanerulerpoq.  Maanna kamaleraangama eqqarsarluaqqaartalerpunga” arnaq Alliami katsorsartissimasoq oqarpoq.

 

2016-imi novemberip kingorna Alliaq qanigisariinni persuttaasartunik inunnik 213-inik katsorsaasimavoq.  Angutinit, arnanit, pissiariinnit, aappariinnit aamma inooqatigiittunit Alliaq saaffigineqartarpoq.  Qaqortumi, Nuummi, Sisimiuni aamma Ilulissani Alliaq tarnip pissusaanik sinniisuutitaqarpoq.  Tamatuma saniatigut skype imaluunnit oqarasuaat atorlugu katsorsartittoqarsinnaavoq.

 

Alliap innuttaasut amerlasuut ikiormagit aammalu inuiaqatigiit persuttaaffiunngitsut anguniarlugit suliaqarnermi Alliaq ikiuutaammat Naalakkersuisup Martha Abelsenip qujamasuutigaa.

 

“Ulloq ullumi persuttaannginnissamut Naalagaaffiit Peqatigiit ulloritippaat.  Suliassaqarfiuvoq assut pingaartitara.  Ataatsimut isiginnittumik pullaveqarluni persuttaasarneq akiorniarneqassaaq.  Innuttaasunut peqqinnanngitsumik pissusilersortarnerminnik kipititsinissaminnik pisariaqartitsisunut neqerooruteqaratta nuannaarutigaara.  Persuttaaneq aaqqiissutaanngisaannarpoq” Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen oqarpoq.

 

Alliami katsorsarneqarnissaq kissaatigigaanni ataasinngornerni sisamanngornernilu nalunaaqutaq 20.00-imiit 22.00-imut 34 50 40-imut sianertoqassaaq.  Alliaq.gl-imiittoq attaveqarnissamut immersugassaq aamma immersorneqarsinnaavoq.  Katsorsarneqarnissamik neqeroorut kinaassutsimik isertuiffiuvoq akeqaranilu.

 

Attavissaq

Paasisaqarnerorusukkuit naalakkersuisup allattaa Inger Heilmann Larsen e-mailikkut: ihla@nanoq.gl imalulunniit oqarasuaatikkut + 299 554160-it attavigiuk.