Nunatsinni utoqqartatsinnut atugassarititaasut pitsaanerusut

Politikerinut, oqartussaasunut suliniaqatigiiffinnullu utoqqarnut atugassarititaasut pillugit ilisimasanik ingerlatitseqqittussamik, utoqqarnullu siunnersuisussamik ilitsersuisussamillu 2020-imiit nunatsinni utoqqartavut inummik peqalissapput. Taamatuttaaq utoqqaat sulisinnaassusillit suliffeqarfeqarfimmiiginnarnissaminnut aningaasaqarnermikkut kajumissaaserneqarnertik misigissavaat.

Inuunitsinni atugassarititaasut nalinginnaasumik pitsaanerulersimapput, sivisunerusumik inuusalerpugut aamma utoqqartavut amerliartorput. Tamaanna nuannaarutigiinnartariaqarparput.

Suliffeqarfeqarfimmiiginnarnissartik utoqqaat amerlasuut kissaatigisaraluarpaat, taamaattorli suliffeqarfeqarfimmiiginnarnissamut aningaasaqarnikkut kajumissuseq utoqqalinersiaqarneq pillugu inatsisip annikillisissinnaasara misigisarpaat.

Tamanna tunuliaqutaralugu Utoqqalinersiaqarneq pillugu Inatsisartut Inatsisaanut allannguutissatut siunnersuut Naalakkersuisut Inatsisartut ukiakkut ataatsimiinneranni saqqummiuppaat, taamaalilluni inatsimmi aningaasanut killissarititaasut arlallit allanngortinneqassallutik.

Tassunga atatillugu Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen ima oqarpoq: “Nunatsinni utoqqaat tamaasa utoqqaat ulloqartinneqarneranni pilluaqqorusuppakka. Utoqqarnut inuunermi atugassarititaasut nalinginnaasumik pitsaanerulermata nuannaarutigeqaara. Taamaattoq utoqqaat nammineq kissaatigisartik malillugu suliffeqarfeqarfimmiiginnarsinnaanerat aamma
taamaaliornermikkut saniatigut isertitaminnik nuannaaruteqarnissaat takorusuppara.”


Suliniut alla, utoqqaat inuiaqatigiinni atugarisaannik patajaallisaasinnaasoq tassaavoq utoqqaat illersuisoqalernissaannik inatsisissatut siunnersuut, taannalu Inatsisartut ukiakkut ataatsimiinneranni saqqummiunneqarpoq. Isummaminnik saqqummiunnissaminnut aamma utoqqartut pitsaasumik inuuneqarnissamik kissaateqarnissaminnut utoqqaat pitsaanerusumik atugassaqartitaasariaqarput.

Naalakkersuisoq oqarpoq: “Innuttaasut utoqqartaasa pitsaasumik inuuneqarnissamut pisariaqartitaannut kissaataannullu pitsaasumik sinaakkutissaqartitsinissaq atugassaqartitsinissarlu qulakkeerneqassaaq. Naalagaaffiit Peqatigiit utoqqarnut ullorititaa utoqqartatta nalliuttorsiutigineqarnerannut atorniartigu”, Martha Abelsen naggasiivoq.

Oktoberip aallaqqaataa Naalagaaffiit Peqatigiit utoqqarnut ulloritippaa. Nunatsinni utoqqartatta inuuniarnerminni atugarisaannut ullormi tassani ukkatarinninnissarput pissutissaqarluarpoq.



Attavissaq
Paasisaqarnerorusukkuit naalakkersuisup allattaa Inger Heilmann Larsen e-mailikkut: ihla@nanoq.gl imaluunniit oqarasuaatikkut + 299 554160-ikkut attavigiuk